Berisha: Martirët e 2 Prillit në Shkodër, burim frymëzimi për çdo qytetar të sakrifikojë për lirinë

Shqiperi

Gazeta Express

02/04/2025 14:49

Kryetari i Partisë Demokratike, Sali Berisha, mori pjesë sot në ceremoninë e nderimit të katër martirëve të vrarë më 2 prill 1991 në Shkodër: Arben Broci, Bujar Bishanaku, Nazmi Kryeziu dhe Besnik Ceka. Gjatë fjalimit të tij, ai theksoi se sakrifica e këtyre martirëve pati një jehonë të madhe ndërkombëtare dhe u bë frymëzim për ata që besojnë në liri dhe votë të lirë.

Berisha deklaroi se regjimi i asokohe i Ramiz Alisë u përpoq të shtypte me dhunë kërkesat e qytetarëve për liri. Ai nënvizoi se sakrifica e martirëve dhe e dhjetëra qytetarëve të plagosur pati një ndikim të jashtëzakonshëm në opinionin demokratik europian dhe botëror, duke sjellë dënimin e ashpër nga Parlamenti Europian, Këshilli i Europës dhe Kongresi i SHBA.

“Me të vërtetë, martirët e votës së lirë u ndanë nga jeta atë ditë, por mbeten të pavdekshëm në shpirtin e lirisë dhe të votës së lirë. Ata janë burim drite dhe frymëzimi për çdo qytetar që beson në lirinë dhe demokracinë”, u shpreh Berisha.

Gjatë fjalimit të tij, kreu i PD nënvizoi rëndësinë e datës 11 maj, duke e cilësuar si një ditë historike që do të ndajë epokat e diktaturës dhe varfërimit nga ajo e lirisë dhe zhvillimit.

Berisha prezantoi gjithashtu një projekt të ri për Shqipërinë, duke u fokusuar në luftën kundër korrupsionit dhe krimit, si dhe në ndërtimin e një shteti që garanton mirëqenie dhe zhvillim të qëndrueshëm për qytetarët.

Ai e përfundoi fjalimin duke nderuar martirët e 2 Prillit dhe duke theksuar pavdekësinë e lirisë dhe dinjitetit njerëzor. “Ne do të vazhdojmë rrugën tonë për një Shqipëri të lirë, demokratike dhe të begatë”, përfundoi Berisha.