Kurti e pret në zyrë të hënën emisarin e ri për dialogun Kosovë -Serbi, pas tij edhe Bislimi

Lajme

Gazeta Express

17/03/2025 0:07

Petar Sorensen, emisari i Bashkimt Evropia për dialogun Kosovë-Serbi, nesër do ta zhvillojë vizitën e tij të parë zyrtare në Kosovë.

Zyra e kryeministrit ka njoftuar se Sorensen të hënën do të takohet edhe me kryeministrin në detyrë Albin Kurti.

Ky takim do të zhvillohet në ora 10:30, më pas emisari i BE-së do të ketë takim edhe me zëvendëskryeminstrin në detyrë Besnik Bislimin.

“Kryeministri i Republikës së Kosovës, Albin Kurti, pret në takim Përfaqësuesin e Posaçëm të Bashkimit Evropian për Dialogun Kosovë-Serbi, Peter Sørensen. Pas takimi me kryeministrin Kurti, Përfaqësuesi i Posaçëm i Bashkimit Evropian për Dialogun Kosovë-Serbi, Peter Sørensen, do të pritet në takim edhe nga Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi”, thuhet në njoftimin e ZKM.

Është e konfirmuar që emisari evropian do të takohet edhe me presidenten Vjosa Osmani.

Sorensen është pasardhës i Miroslav Lajçak, gjatë mandatit të të cilit është arritur një marrëveshje e Brukselit në mes Kosovës dhe Serbisë, si dhe aneksi i Ohrit.

Marrëveshje ishte zotim dypalësh, por jo edhe nënshkrim.

Kosova akuzon Serbinë që nuk po i zbaton marrëveshjet e Brukselit, ndërkaq Beogradi akuzon Kosovën se nuk po e implementojnë Asocacionin e komunave me shumicë serbe. /Gazeta Express