Vazhdon aventura e rrezikshme politike e Dodikut: Sot dy seanca speciale të Asamblesë Kombëtare të RS

Lajme

Gazeta Express

12/03/2025 7:32

Kolegjiumi i Asamblesë Kombëtare të Republikës Srpska për sot në ora 11:00 ka caktuar seancën e 19-të speciale të Kuvendit Kombëtar të Republikës Srpska me pikën e rendit të ditës – Propozim vendim për të vazhduar me miratimin e kushtetutës së re të Republikës Srpska.

Pas seancës së 19-të speciale, menjëherë u caktua seanca e 20-të e posaçme e Kuvendit Kombëtar, për të cilën u propozuan dy pika të rendit të ditës – Projekt-Kushtetuta e Republikës Srpska dhe Propozimi i Ligjit për mbrojtjen e rendit kushtetues të Republikës Srpska – me procedurë urgjente (propozim i Presidentit të Republikës).

Kryetari i Asamblesë Kombëtare të Republikës Srpska, Nenad Stevandiq, tha se kushtetuta e re nuk kërkon shumicën në çdo klub të popujve përbërës në Këshillin e Popujve të RS-së, siç kërkohet gjatë ndryshimit të kushtetutës.

“Nëse votohet për një kushtetutë të re, kjo bëhet me referendum kushtetues ose me shumicë prej dy të tretash, dhe nëse bëhen ndryshime në Kushtetutë, nevojitet shumicë në Këshillin e Popullit”, tha Stevandiq.

Procedura, tha ai, është e tillë që në seancën e parë merret vendimi për ndryshime apo kushtetutë të re, pastaj menjëherë pasohet nga seanca e dytë në të cilën miratohet drafti, pasohet nga një debat publik dhe vetëm pas kësaj është seanca e tretë në të cilën do të ndryshohet ose zgjidhet kushtetuta e re.

Ai shpjegoi se në seancën e parë dhe të dytë kërkohet një shumicë e thjeshtë, ndërsa kushtetuta e re miratohet me dy të tretat ose 56 deputetë, ose 55 sipas interpretimit të ri.

Opozita ka njoftuar se nuk do ta mbështesë këtë aventurë të rrezikshme dhe radikalizimin e mëtejshëm të situatës vetëm për mbrojtjen e Milorad Dodikut.

Me kushtetutën e re ata duan të krijojnë një prokurori speciale dhe një njësi paraburgimi për ata që shkelin ligjin për mbrojtjen e rendit kushtetues, për të cilin opozitarët dhe analistët besojnë se do të jetë një mjet në duart e autoriteteve për të goditur të gjithë kundërshtarët.

Kushtetuta parashikon gjithashtu mundësinë e vetëvendosjes së RS, krijimin e një konfederate me një shtet tjetër, formimin e një ushtrie etj.