Protesta e mbështetësve të Veliaj, Bardhi: Hoxha gënjeu në Kuvend, të shkarkohet bashkë me drejtorin e policisë

Shqiperi

Gazeta Express

14/02/2025 12:55

Gazment Bardhi, akuzoi këtë të premte ministrin e Brendshëm, Ervin Hoxha se gënjeu dhe keqinformoi publikisht gjatë seancës parlamentare lidhur me sjelljen e policisë në protestën që zhvilluan mbështetësit e Erion Veliajt para GJKKO-së.

“Ministri i Brendshëm gënjeu dje publikisht dhe keqinformoi Kuvendin e Shqipërisë lidhur me mosveprimin e Policisë së Shtetit ndaj tentativës mafioze të drejtorëve batakçi të Bashkisë së Tiranës për të intimiduar fizikisht në krye të detyrës gjyqtarët dhe prokurorët e posaçëm. Ky mashtrim institucional dhe publik i Ministrit të Brendshëm provon edhe autorësinë e urdhrit politik për të penguar drejtësinë që të mbajë përgjegjës para ligjit cilido, pavarësisht statusit të tij.

Edi Rama mund të zgjedhë të jetë avokat i Erion Veliajt, por këtë duhet ta bëjë privatisht, jo duke keqpërdorur institucionet e shtetit. Mosveprimi i Policisë së Shtetit, që sipas GJKKO dhe SPAK, ka vënë në rrezik jetën dhe shëndetin e gjyqtarëve, prokurorëve dhe stafit administrativ, në krye të detyrës, nuk mund të kalojë në heshtje. Ministri i Brendshëm dhe Drejtori i Përgjithshëm i Policisë së Shtetit duhet të shkarkohen menjëherë nga detyra dhe të ndiqen penalisht”, tha Bardhi.