Napoli i hapur për ta shitur Kvaratskhelian, ia cakton çmimin

Futboll

Gazeta Express

09/01/2025 16:58

Pozicioni i Khvicha Kvaratskhelias për të ardhmen e tij nuk ka ndryshuar me ardhjen e Antonio Contes te Napoli, pasi ai ende dëshiron të largohet nga Stadio Diego Maradona. Klubi tani është i hapur të shqyrtojë largimin e tij në janar, pas rifillimit të bisedimeve me PSG-në.

Ylli gjeorgjian dukej tashmë pranë largimit nga Partenopei verën e kaluar, por përfundimisht mbeti në Serie A pas emërimit të trajnerit italian. Megjithatë, në muajt e fundit, të dyja palët nuk kanë bërë ndonjë përparim domethënës në bisedimet për zgjatjen e kontratës.

Me gjigantët e Ligue 1 që thuhet se janë të gatshëm të rinisin negociatat për 23-vjeçarin, situata mund të ndryshojë krahasuar me verën e kaluar. Napoli është i gatshëm të dëgjojë oferta gjatë afatit kalimtar të dimrit, veçanërisht pasi kanë mësuar se lojtari ende dëshiron të largohet dhe me shumë gjasë nuk do të nënshkruajë një kontratë të re, sipas Tuttomercatoweb.

PSG thuhet se po konsideron një marrëveshje shkëmbimi lojtar-plus-pará, që mund të përfshijë qendërmbrojtësin Milan Skriniar. Sipas Gianluca Di Marzio, Napoli do të ishte i gatshëm ta shesë lojtarin për një shumë prej 80 milionë eurosh në pará.

Forma e shkëlqyer e David Neres kohët e fundit ka bërë që klubi të mos e konsiderojë më Kvaratskhelian të paprekshëm, ndërsa po shqyrton edhe zëvendësues potencialë. Në radarët e tyre janë Federico Chiesa dhe Edon Zhegrova nga Lille.

Reprezentuesi i Gjeorgjisë ka arritur të shënojë pesë gola në 17 paraqitje në Serie A për Napolin këtë sezon, megjithëse goli i tij i fundit erdhi gjatë fitores 2-0 ndaj Milanit në fund të tetorit.