Stilisti Shpëtim Bunjaku Modernizon Figurën e Mitit Shqiptar “ZANĒ”

Rozë

Gazeta Express

17/07/2024 13:46

Stilisti i njohur dhe dizajneri i talentuar Shpetim Bunjaku ka prezantuar editorialin e tij më të ri, “ZANĒ”. Kjo punë e veçantë përqendrohet në modernizimin e figurës së mitit shqiptar, duke e sjellë këtë legjendë të lashtë në skenën e modës bashkëkohore.

Shpetim Bunjaku është një emër i njohur në fushën e modës, falë ilustrimeve të tij mbresëlënëse që kanë marrë vëmendjen e emrave të mëdhenj të industrisë si Versace, Roberto Cavalli, Naomi Campbell, Paris Hilton dhe Fenty. Këtë herë Shpëtimi kthehet në rrënjët kulturore shqiptare, duke eksploruar dhe risjellë një nga figurat më të dashura të mitologjisë shqiptare – Zanën.

Në mitologjinë shqiptare, Zana përshkruhet si një krijesë magjike e maleve, e cila është e njohur për bukurinë e saj të jashtëzakonshme dhe fuqitë e saj mbinatyrore. Zanat janë shpesh të lidhura me natyrën dhe kanë aftësi të mbrojnë dhe ndihmojnë njerëzit e mirë. Me këngën dhe vallëzimin e tyre, ato sjellin një magji të veçantë në pyjet dhe malet shqiptare, duke qenë një simbol i fuqishëm i lidhjes së njeriut me natyrën.

Duke u nisur nga kjo figurë mitologjike, Shpetim Bunjaku ka krijuar një koleksion të jashtëzakonshëm që kombinon elemente tradicionale me stilin modern. Editoriali “ZANĒ” përfshin veshje që reflektojnë bukurinë dhe elegancën e Zanave, por me një prekje bashkëkohore që e bën këtë mit të lashtë të duket i freskët për audiencën e sotme, duke sjellë një interpretim të ri dhe të guximshëm të kësaj legjende.

Kjo iniciativë për të modernizuar figurën e Zanës është një dëshmi e dashurisë së tij për kulturën shqiptare dhe përkushtimit të tij për të sjellë në vëmendje thesaret e pasura të traditës sonë. Përmes këtij editoriali, ai jo vetëm që nderon mitologjinë shqiptare, por edhe e bën atë të prekshme dhe të admirueshme për një audiencë globale, duke treguar se legjendat tona mund të jenë burim frymëzimi dhe inovacioni edhe në botën moderne të modës.