I biri u vra me snajper, Sokol Sinomati del nga burgu dhe merr pjesë në varrim

Shqiperi

Gazeta Express

09/01/2024 12:50

Këtë të martë, Sokol Sinomati, ka dalë nga burgu për disa orë, për të marrë pjesë në ceremoninë mortore të të birit Gëzim Sinomataj, i cili u ekzekutua të dielën në mbrëmje, në qytetin e Vlorës.

Siç duket edhe nga këto pamje, ai shoqërohet nga forca të shumta policie.

Sokol Sinomati, ka qenë anëtar i bandës famëkeqe të Gaxhait, e pikërisht aktiviteti kriminal i të atit, është një prej pistave e atentatit ndaj djalit të tij, Gëzimit.

22-vjeçari kishte dalë në ballkonin e shtëpisë së tij në katin e tretë të një pallati në “Hajro Çakërri”, kur u qëllua me një plumb në kokë.

Sinomati dyshohet se u qëllua me snajper nga një ndërtesë përballë.

Pak kohë pas ngjarjes, policia gjeti në flakë makinën e autorëve të dyshuar, identiteti i të cilëve nuk dihet ende.

Gjatë ditës së hënë, policia shoqëroi të paktën 10 persona, kryesisht të afërm të 22-vjeçarit të cilët dhanë dëshminë e tyre në lidhje me ngjarjen.