Gjatë pandemisë covid19 në spitalet shqiptare pati probleme me mungesën e materialeve mbrojtëse

Gazeta Express

16/07/2020 19:06

Mungesa e materialeve të mbrojtjes personale, informimi dhe trajnimi i stafit, janë disa nga problematikat kryesore që ka hasur sistemi shëndetësor në Shqipëri gjatë periudhës mars-maj të pandemisë.

Shoqata “Together for Life” me mbështetjen e Fondacionit “Konrad Adenauer” zhvilloi një studim me profesionistë të kujdesit shëndetësor publik, i cili ka shfaqur disa problematika mbas shpërthimit dhe përhapjes së virusit COVID-19.

Sipas një studimi të realizuar nga Shoqata “Together for Life” me mbështetjen e Fondacionit “Konrad Adenauer Stiftung” shqetësimet kryesore të personelit mjekësor janë evidentuar kryesisht në mungesën e materialeve të mbrojtjes personale si dhe në informimin dhe trajnimin e stafit.

Në periudhën mars–maj 2020, faza fillestare e koronavirusit në vend, vetëm 1/3 e personelit deklaron se institucioni i tyre ka pasur materialet e duhura mbrojtëse dhe 1/4 i kanë pasur ato në sasi të mjaftueshme, ndërkohë që 1/10 nuk kanë pasur fare.

Nën këto rrethana, stafi i ka përdorur materialet e mbrojtjes personale me kursim, madje duke mos i përdorur fare në disa raste të nevojshme.

Mjekët dhe infermierët në spitalet COVID-19 janë më mirë të pajisur me të gjitha materialet e mbrojtjes personale, e megjithatë më pak se gjysma e personelit kanë sasi të mjaftueshme të materialeve kryesore mbrojtëse për punën me pacientët e konfirmuar me COVID-19, siç janë maskat e duhura, përparëse kirurgjie njëpërdorimshme me mëngë të gjata që bëjnë izolim total apo mbrojtëse për sytë (syze ose helmeta mbrojtëse). Njësoj edhe mbulojat e njëpërdorshme për këpucët.

Gati 2/5 e personelit tregojnë se kanë marrë një trajnim të tillë në kuadër të pandemisë COVID-19 në lidhje me përdorimin, veshjen, zhveshjen dhe eliminimin e sigurt të materialeve mbrojtëse.

Për sa i përket testimeve të personelit mjekësor, shumica e atyre që punonin pranë spitaleve Covid kanë pohuar se testimet kanë qenë një praktikë e zakonshme.

Pjesa tjetër e personelit në spitale pohojnë se testi nuk është kryer edhe në rastet kur ata vetë kanë shfaqur simptoma apo pasi janë vetë-izoluar si pasojë e familjarëve që kanë shfaqur simptoma. Të punuarit në kushtet të mungesës së mbrojtjes të përshtatshme si dhe mungesë të trajnimeve dhe politikat e varfra institucionale për testim të personelit kanë ndikimin e tyre tek 30% e stafit të cilët nuk ndjehen aspak të sigurt e të mbrojtur në vendin e punës.

Lodhje, stres dhe pagjumësi janë tri simptomat më të shfaqura tek personeli shëndetësor gjatë periudhës mars-maj 2020, të pasuara nga ankthi dhe mungesa e dëshirës./euronews