63 vite burg për bandën që festoi lirimin e babait të Diaz me drogë

Futboll

Gazeta Express

10/02/2026 22:59

Një bandë droge nga Liverpooli, që bëri një ofertë promocionale për kokainë për të shënuar lirimin e babait të ish-yllit të Liverpoolit, Luis Diaz, nga një rrëmbim, u zbulua dhe përfundoi në burg me dënime që arrijnë mbi 63 vite gjithsej.

Në nëntor 2023, Luis Manuel Diaz – babai i lojtarit që tani luan te Bayern Munich – u lirua pas 13 ditësh në robëri nga një grup gueril kolumbian. Për ta “festuar” këtë dhe për të rritur shitjet, banda dërgoi një mesazh te më shumë se 9,000 klientë përmes një telefoni të posaçëm të përdorur për trafik droge, ku shkruhej: “3 për £75 për orën e ardhshme për të festuar lirimin e babait të Luis Diaz nga xhungla kolumbiane.”

Ky mesazh thuhet se çoi në rënien e tyre. Të hënën, lideri Paul Lockyer (42 vjeç) dhe shtatë bashkëpunëtorë nga Merseyside u dënuan në Gjykatën e Kurorës në Liverpool pas një hetimi të gjatë nga Merseyside Organised Crime Partnership, ku morën pjesë edhe National Crime Agency dhe policia lokale.

Lockyer, i njohur si “the big fella”, ishte figura kryesore, ndërsa James Neary (57) ishte krahu i tij i djathtë. Banda punonte me turne për të përmbushur qindra porosi në çdo orë të ditës, duke ruajtur drogën në disa adresa në Liverpool dhe duke përdorur telefonin e dedikuar për porositë.

Hetuesit e kishin monitoruar prej kohësh aktivitetin, duke ndjekur kalimin e telefonit mes anëtarëve dhe takimet për marrjen e drogës. Në telefon u gjetën mbi 9,000 kontakte dhe mesazhe promocionale për klientët, përfshirë oferta, zbritje dhe “dorëzim në shtëpi”.

Një ekspert droge deklaroi në gjykatë se “nuk kishte hasur kurrë një linjë droge kaq mirë të organizuar”. Banda besohet të ketë furnizuar të paktën 9.9 kg kokainë nga tetori 2023 deri në maj 2025, duke fituar rreth 620,000 paund.

Anëtarë të tjerë përfshinin Paul McArdle (33), që koordinonte dërgesat; Christopher Horrocks (46) dhe Stephen Lynch (38), që menaxhonin marrëveshjet dhe furnizimin; Michelle Higgins (39), që ruante sasi të mëdha në shtëpi; si dhe Lee Nugent (46) dhe partnerja e tij Julie McCafferty (43), që përgatisnin dhe shpërndanin drogën.

Të tetë u arrestuan në maj të vitit të kaluar pas kontrolleve në disa adresa, ku u sekuestruan 874 gram kokainë me vlerë rreth £89,000, si dhe një bllok 1 kg kokainë dhe sasi të mëdha substancash përzierëse.

Të gjithë pranuan fajësinë për komplot për furnizim me drogë të klasit A dhe u dënuan me gjithsej 63 vite e 8 muaj burg. Lockyer mori 11 vite e 4 muaj, Neary 9 vite e 9 muaj, McArdle 10 vite e 1 muaj, Lynch dhe Nugent nga 8 vite, McCafferty dhe Horrocks nga 6 vite, ndërsa Higgins 4 vite e gjysmë.

Zyrtari i NCA Jon Hughes tha se rrjeti funksiononte si “shërbim fast-food për drogë”, duke shtuar se mbyllja e këtij biznesi kriminal është shumë e rëndësishme për komunitetin e Liverpoolit./GazetaExpress/