50 mijë funte në vit për shoqërues personal me udhëtime në Monako

Fun

Gazeta Express

04/03/2026 22:59

Një grua po ofron deri në 50 mijë paund në vit për një person që do të jetojë me të si kujdestar shtëpie dhe shoqërues personal, duke e shoqëruar në darka, teatër, udhëtime dhe qëndrime të rregullta në Monako.

Sipas njoftimit të publikuar nga HomeOrganisers, bëhet fjalë për një pozicion me kohë të plotë “live-in”, që përfshin akomodim me dhomë gjumi dhe banjë private. Paga varion nga 45,000 deri në 50,000 paund në vit.           

Kandidatja ose kandidati i përzgjedhur do të punojë për një “zonjë të pavarur dhe të sjellshme”, duke u kujdesur për mirëmbajtjen e dy banesave të saj – në Doncaster dhe në Londër – si dhe duke e shoqëruar në aktivitete të përditshme. Përveç qëndrimeve në Mbretërinë e Bashkuar, roli përfshin edhe udhëtime të herëpashershme në Monako.

Përgjegjësitë përfshijnë pastrimin dhe mirëmbajtjen e shtëpive në standard të lartë, larjen dhe hekurosjen e rrobave, organizimin e garderobës dhe sigurimin që ambientet të jenë gjithmonë të rregullta dhe funksionale. Gjithashtu kërkohet përgatitja e vakteve të thjeshta, të freskëta dhe të shëndetshme, si dhe drejtimi i makinës për takime, blerje apo dalje të ndryshme. Personi i punësuar do ta shoqërojë punëdhënësen edhe në udhëtimet me tren mes Doncaster-it dhe Londrës.

Por roli nuk kufizohet vetëm te punët e shtëpisë. Ai përfshin edhe shoqërim në teatro, darka jashtë, evente kulturore dhe udhëtime, duke kërkuar një prani të ngrohtë, pozitive dhe mbështetëse, por që njëkohësisht respekton pavarësinë e punëdhënëses.

Kandidatët duhet të kenë përvojë të mëparshme në familje private, të jenë të aftë të menaxhojnë në mënyrë të pavarur një banesë, si dhe të jenë të besueshëm, diskretë, të organizuar dhe proaktivë. Kërkohet gjithashtu leje drejtimi e pastër dhe gatishmëri për të jetuar dhe udhëtuar si pjesë e punës.

Pozicioni paraqitet si një kombinim mes përgjegjësisë profesionale dhe marrëdhënieje afatgjatë besimi – një rol i pazakontë që bashkon kujdesin për shtëpinë me shoqërimin personal në jetën e përditshme dhe në udhëtime luksoze. /GazetaExpress/