17 mijë tërmete goditën Islandën gjatë javës së kaluar - Gazeta Express

Lajme

Gazeta Express

04/03/2021 10:57

17 mijë tërmete goditën Islandën gjatë javës së kaluar

Lajme

Gazeta Express

04/03/2021 10:57

Edhe pse është një ishull vullkanik i mësuar me dridhje të herëpashershme, kjo ka qenë një javë e pazakontë për Islandën. Sipas Zyrës Meteorologjike Islandeze, rreth 17 mijë tërmete kanë goditur rajonin jugperëndimor të Reykjanes gjatë javës së kaluar.

Tërmeti më i madh, me magnitudë 5.6 ballë në shkallën Rihter, ndodhi në mëngjesin e 24 shkurtit.

Ishte më i forti në një valë tërmetesh që vazhdon të trondisë banorët në kryeqytetin afër Reykjavík dhe komunat përreth tij.

Dy tërmete më të mëdhenj me magnitudë 5.0 ballë tronditën vendin, gjithashtu më 27 shkurt dhe 1 mars.

Tërmetet kanë shkaktuar pak dëme deri më tani, megjithëse Administrata Rrugore dhe Bregdetare e Islandës ka raportuar çarje të vogla në rrugë në zonë dhe rënie shkëmbinjsh në shpatet e pjerrëta pranë epiqendrës.

“Unë kam përjetuar tërmete më parë, por kurrë kaq shumë me radhë”, tha një banor i Reykjavikut për CNN.

“Është shumë e pazakontë të ndjesh tokën të dridhet 24 orë në ditë, për një javë të tërë. Kjo të bën të ndihesh shumë i vogël dhe i pafuqishëm kundër natyrës.”

Një profesor i vullkanologjisë në Universitetin e Islandës, tha se shqetësimet mbi aktivitetin e fundit sizmik janë të kuptueshme.

“Sigurisht që i shqetëson njerëzit. Për këtë rajon, kjo është me të vërtetë mjaft e pazakontë, jo për shkak të llojit të tërmeteve ose intensitetit të tyre, por për kohëzgjatjen e tyre. Po shkon më shumë se një javë tani. Pse po ndodh kjo? Ka shumë të ngjarë që të kemi një ndërhyrje të magmës në koren e Tokës. Ajo ka lëvizur përfundimisht më afër sipërfaqes, por ne po përpiqemi për të kuptuar nëse po lëviz edhe më afër”, tha ai.

Me vullkane të shumta në zonë, zyrtarët lokalë kanë paralajmëruar se një shpërthim tjetër mund të jetë i pashmangshëm.

Islanda ndodhet në një kufi të pllakave tektonike mes Amerikës së Veriut dhe Euroazisë dhe dridhjet e tokës janë një fenomen normal i një rajoni të tillë sizmik.