115 vjet nga lindja e Shën Nënë Terezës

Shqiperi

Gazeta Express

26/08/2025 9:54

Sot, më 26 gusht, shënohet 115-vjetori i lindjes së Shën Nënë Terezës, shenjtores shqiptare të njohur ndërkombëtarisht. Gonxhe Bojaxhiu, e njohur si Nënë Tereza, lindi në Shkup në vitin 1910, atëherë pjesë e Vilajetit të Kosovës në Perandorinë Osmane. Pasi jetoi në Maqedoni, ajo u shpërngul në Irlandë dhe më pas në Indi, ku krijoi një pasuri të madhe shpirtërore dhe kontribuoi në përmirësimin e kushteve të jetesës për të varfrit dhe të sëmurët.

Nënë Tereza themeloi Misionarët e Bamirësisë, një kongregacion fetar që, deri në vitin 2012, numëronte mbi 4.500 motra dhe ishte i pranishëm në 133 shtete. Ajo u nderua me shumë çmime dhe tituj, përfshirë Çmimin Nobel për Paqe në vitin 1979 dhe Çmimin e Paqes Ramon Magsaysay në vitin 1962.

Më 19 tetor 2003, Nënë Tereza u shpall “Tereza e Bekuar e Kalkutës”, dhe më pas, në dhjetor 2015, Papa Françesku i njohu një mrekulli të dytë, duke i hapur rrugën për kanonizimin e saj. Nënë Tereza u shpall shenjore më 4 shtator 2016, një ditë para 19-vjetorit të vdekjes së saj, dhe kjo datë tani njihet si dita e festës së saj.

Fjalët e saj për popullin shqiptar dhe lutjet për paqe dhe ndihmë për të varfrit mbeten një kujtim i paharrueshëm për të gjithë ata që e njohën dhe e vlerësuan veprën e saj.