Google është duke i bërë produktet e veta me harta dukshëm më të dobishme dhe informuese me ndihmën e fotografive, ndërsa tani gjigandi i teknologjisë e ka siguruar një pasqyrë më të thellë në procesin e vet të krijimit të hartave, raporton Engadget.
Kompania thekson se i ka krijuar rreth 16 milionë kilometra të fotove të Street View deri më tani. Gjithashtu, është theksuar se Google Earth i ka 36 milionë milje katrorë fotografi satelitore HD të cilat mund të kërkohen, ndërsa këto foto e mbulojnë 98 për qind të popullsisë së përgjithshme në botë.
Kjo është hera e parë që Google ka publikuar të dhëna në lidhje me shërbimin Maps, i cili është një nga produktet më të njohura të kompanisë.
Google Earth ka përmendur gjithashtu teknikat e përdorura për krijimin e fotove të hartave, shkruan Koha. Tashmë e dimë se kompania përdor automobila Street View të pajisur me kamera, të cilat mund të krijojnë foto nga kënde të ndryshme gjatë lëvizjes. Për zonat ku ngasja e automobilave nuk është e mundur, Google ka dërguar njerëz me ruksakë Street View Trekker për ta shënjuar terrenin.
Kompania gjithashtu ka shpjeguar se është duke e përdorur teknikën e quajtur “fotogrametri” për t’i bashkuar disa foto. E njëjta teknikë përdoret për përvojën VR të Google (siç janë turnetë virtuale të Versajës për përdoruesit e HTC Vive dhe Oculus Rift).