Von Cramon: Anëtarësimi i Kosovës në OKB nuk është në dorën e Serbisë

Lajme

Gazeta Express

28/03/2023 10:32

Eurodeputetja Viola von Cramon është pyetur për deklaratën e presidentit të Serbisë, Aleksandar Vuçiq, i cili tha se do të zbatonte të gjitha pikat e marrëveshjes së Ohrit përveç asaj për anëtarësimin e Kosovës në OKB.

Von Cramon tha se hyrja e Kosovës në OKB nuk varet nga Serbia, ndërsa këtë deklaratë të Vuçiqit, ajo po e sheh për opinionin e brendshëm në Serbi.

“Le të jemi të sinqertë – nuk i takon Serbisë të vendosë nëse Kosova mund të hyjë në OKB. E kuptoj që kjo [deklaratë] është për audiencën e brendshme, por në fund të fundit nuk është në dorën e Serbisë, sepse pranimi në OKB varet nga vendimi i Këshillit të Sigurimit ku Kina apo Rusia ende mund të vënë veton”, tha von Cramon për Nova.rs, transmeton Gazeta Express.

Eurodeputetja tha se është për të ardhur keq që Vuçiq pretendoi se Serbia s’ka nënshkruar asgjë, derisa tha se këto deklarata të tij u pritën keq në Bruksel.

“Ne i ndoqëm me vëmendje deklaratat e tij para marrëveshjes, të cilat ishin për t’u lavdëruar, sepse hapën rrugën për arritjen e marrëveshjes. Megjithatë, retorika në fund…u prit shumë keq si në Bruksel ashtu edhe në kryeqytetet kryesore të BE-së”.

Von Cramon u pyet edhe nëse kjo marrëveshje do të thotë se Serbia nuk mund të bëhet anëtare e Bashkimit Europian para se ta lejojë Kosovën të bëhet anëtare e OKB-së

“Jo. Thjesht do të thotë se kontrata është ligjërisht e detyrueshme, e cila ishte një mënyrë për të siguruar vlefshmërinë e saj edhe pa nënshkrim. Tani është pjesë e kritereve për anëtarësimin e Serbisë në BE dhe vetëm zbatimi i plotë i saj do t’i lejojë Serbisë mbylljen e negociatave. Rruga e Kosovës drejt OKB-së nuk ka asnjë lidhje me të”.

Von Cramon tha se BE nuk është fajtore për rezistencën në Serbi karshi planit franko-gjerman. Madje, ajo thotë se roli i BE-së është për nxitje të stabilitetit në këtë rajon.

“Unë nuk do të fajësoja BE-në për këtë. BE-ja mund dhe është pjesërisht fajtore për nxitjen e stabilitetit në disa vende të Ballkanit ose për ndalimin efektiv të procesit të zgjerimit, sepse ne kemi frikë të pranojmë anëtarë të rinj, sapo të lindin frustrimi në rajon. Megjithatë, kur është fjala për diskutimin për çështjen e Kosovës, do të ishte e dobishme që Serbia të pajtohej me të kaluarën e saj. Nuk është e lehtë, por është e nevojshme. Është përgjigjja për atë që ndodhi dhe pse situata është kështu sot. Kosova keqpërdoret si çështje në Serbi dhe për këtë arsye partitë e djathta po rriten. Por kur kjo të zhduket, ne do të shohim në mënyrë të pashmangshme rënien e tyre”.

Von Cramon tha se e sigurt se pozita ndërkombëtare e Serbisë do të kishte qenë shumë më e mirë nëse do të kishte vendosur sanksione ndaj Rusisë.

“Kemi vënë re renditjen e Serbisë në OKB dhe në forume të tjera ndërkombëtare, por ajo që duhet të shohim është jo vetëm vendosja e sanksioneve, por edhe një largim i qartë nga Rusia. Prania e RT dhe Sputnik, të cilat prodhojnë përmbajtje në gjuhën serbe, e bën këtë jashtëzakonisht të vështirë dhe për këtë arsye ne insistojmë që Serbia t’i ndalojë ato. Gjithashtu, drejtori prorus i BIA-s, Aleksandar Vulin, është një shembull tjetër se pse Serbia ka një reputacion si një kukull ruse në Ballkan. Ne po humbasim besimin në shërbimin e inteligjencës serbe dhe unë personalisht do të kisha frikë të bëja diçka kundër Rusisë në Serbi për sa kohë që ai mban atë pozicion”.