Vetura e popullarizuar franceze merr zero yje në vlerësimin e sigurisë

Lajme

Gazeta Express

08/12/2021 12:45

Prodhuesi i njohur francez i veturave, Renault, mori një goditje të mërkurën, pasi modeli i tij i popullarizuar, Zoe, mori zero yje në vlerësimin e sigurisë nga Programi Evropian për Vlerësimin e Veturave të Reja (NCAP), në testet që janë standarde për Evropë.

Kompania u vlerësua dobët edhe për modelin e prodhuesit tjetër, që është pjesë e saj, Dacia, më saktësisht për modelin Dacia Spring, me vetëm një yll.

“Renault dikur ishte sinonim i sigurisë, por këto rezultate zhgënjyese për Zoe dhe Spring tregojnë se siguria tashmë është bërë dëm kolateral në tranzicionin e grupit te veturat elektrike”, tha sekretari i përgjithshëm i programit NCAP, Michiel van Ratingen.

Për ta parë videon e testimit të veturës Renault Zoe, klikoni KËTU.

Sidoqoftë, kompania franceze tha përmes një deklarate se modeli “Zoe” është veturë e sigurt, që i ka plotësuar të gjitha standardet e rregullatorëve për siguri, shkruan Reuters, përcjell Gazeta Express.

“Këto standarde janë duke evlouuar vazhdimisht dhe po bëhen gjithnjë më të rrepta në të gjitha fushat, sidomos në aspektin e sigurisë. Prandaj, Renault vazhdimisht është duke e përmirësuar ofertën me qëllim të plotësimit të rregulloreve të zbatueshme ku shiten veturat e saj”, thuhet në deklaratën e prodhuesit francez.

Kjo është vetëm hera e tretë që Euro NCAP ka vlerësuar një veturë me zero yje dhe nëse ky vlerësim i dëmton shitjet e modelit “Zoe”, mund ta shtyjë prodhuesin që të bëjë një përditësim të shpejtë ose ta përshpejtojë hedhjen në treg të versionit të ardhshëm të veturës.