Vera e përgjysmuar pa mërgimtarët

Gazeta Express

12/07/2020 9:42

Gazmend Dashi mezi pret verën që me familje të marrë rrugë nga Pfaffenhofeni i Bavarisë drejt vendlindjes në Stagovë të Kaçanikut. Shumicën e herëve vjen qëllimshëm me makinë që t’ua rrëfejë tre fëmijëve historinë e viseve të ndryshme shqiptare. Edhe në marsin e sivjetmë, kur pandemia nisi të përhapej me të madhe edhe në shtetet e Bashkimit Evropian, Dashët ende shpresonin se do t’i kalonin pushimet verore në shpatet e fshatit malor të qytezës jugore të Kosovës.

“Po, gjithsesi, kemi planifikuar pushimet në Kosovë”, thekson që në krye të bisedës virtuale kryefamiljari Dashi, aktivist i njohur i shoqatës “Sali Çekaj” – dikur “Fan Noli” në qytetin jugor të Gjermanisë. Sikurse ai, edhe shumë mërgimtarë të tjerë kishin planifikuar pushimet dyjavore për festën e Pashkëve gjatë freskisë pranverore, apo gjatë muajve të nxehtë të verës. Megjithatë, virusi me kurorë ia ka ndryshuar planet Dashit. Dhe shumë të tjerëve, shkruan KOHA Ditore.

Gazmend Dashi, lindur e rritur në Stagovë të Kaçanikut, jeton me familjen pesëanëtarëshe në qytetin bavarez Pfaffenhofen

“I/e dashur mërgimtar/e”

“Situata e keqe e pandemisë ka pamundësuar realizimin e këtyre pushimeve dhe ka lënë te shumica e mërgatës një ndjenjë dhimbjeje shpirtërore, sepse ajo është e lidhur me vendin dhe familjarët e tyre shpirtërisht, pavarësisht nga perceptimi, për mendimin tim, i gabuar, i disa individëve për mërgatën!” – thekson ai.

Me “I/e dashur mërgimtar/e” u është drejtuar më 3 korrik gubertqarëve poeti Besim Zymberi në poezinë e prej dhjetë vargjesh. “Këtij fillimkorriku, më shumë se vapa, më djeg mungesa e pranisë sate këtu…” – ka varguar Zymberi në postimin virtual që ka nxitur diskutimin e shumë komentuesve, përfshirë edhe mërgimtarë. “E kam frymëzimin më të thellë zërin tënd të munguar…”