Sot në Teatrin ‘Oda’ luhet shfaqja “Negotiating Peace”

Arte

Gazeta Express

03/04/2025 14:44

Më 4 prill nga ora 20:00 në Teatrin Oda rikthehet shfaqja “Negotiating Prace” shkruar nga Jeton Neziraj me regji të Blerta Nezirajt.

Për shfaqjen:

Negocimi i paqes pas konflikteve të armatosura është sfidë komplekse diplomatike. Në disa raste, arrihen marrëveshje të paqes; në disa të tjera, paqja e plotë nuk arrihet kurrë ose thjesht mbetet një marrëveshje në letër. Luftat dhe konfliktet e shumta, ngrisin pyetje të shumështresuara dhe lënë prapa paqartësi, të cilat e bëjnë paqjen të vështirë. Duke u nisur nga negociatat e paqes, duke përfshirë marrëveshjen e Dejtonit, marrëveshjet në Irlandën Veriore dhe ato të Lindjes së Mesme, bisedimet politike — ende pa shumë rezultat — ndërmjet Kosovës dhe Serbisë dhe duke e paramenduar si do të duket fundi i luftës ndërmjet Rusisë dhe Ukrainës, Qendra Multimedia ka bërë bashkë një ansambël pan-evropian për të krijuar NEGOTIATING PEACE. Ky produksion është krijuar me artistë dhe grupe teatrore nga Ukraina, Kosova, Serbia, Bosnja dhe Hercegovina, Italia, Çekia, Shqipëria, Maqedonia e Veriut, Norvegjia, Polonia dhe Estonia. E frymëzuar nga libri I Richard Holbrooke “To End a War” dhe “Gjenerali i Ushtrisë së Vdekur” i Kadaresë, NEGOTIATING PEACE tenton të ballafaqojë publikun me prapavijat, sfidat, frikat dhe shpresën që e shoqërojnë arritjen e një marrëveshjeje të paqes si dhe diskuton tema të rëndësishme: Kush mund të negociojë paqen? A u takon politikanëve legjitimeti për të bërë një gjë të tillë? A pajtohen vërtet njerëzit e zakonshëm pas nënshkrimit të ‘aktit të paqes’ në emrin e tyre? A mund të ketë falje kolektive, apo falja është akt individual?

Aktorë: Shkumbin Istrefi, Ema Andrea, Harald Thompson Rosentrøm, Ejla Bavcic, Martin Kõiv, Melihate Qena, Orest Pastukh