Shtatë anëtarë të Prishtinës dalin pozitivë me koronavirus, tre prej tyre lojtarë

Gazeta Express

07/08/2020 11:35

FC Prishtina e ka konfirmuar se nga lojtarët dhe stafi i klubit kanë dalë shtatë rezultate pozitive me koronavirus, vetëm pak para fillimit të kualifikimeve për Ligën e Evropës.

Stafi i Prishtinës u testua të enjten dhe nga 34 testet e bëra, shtatë prej tyre kanë dalë pozitivë. Prej këtyre shtatë, tre janë lojtarë, njëri 17-vjeçar dhe katër anëtarë të stafit të ekipit, transmeton Gazeta Express.

“FC Prishtina e priste një rezultat të tillë dhe ky testim i duhej që skuadra të ishte sa më e sigurt para ndeshjeve të Evropës. Të gjithë të infektuarit nuk kanë simptome të theksuara dhe nuk kanë udhëtuar me skuadrën në Istog ku sot në mëngjes mbajti seancën e parë stërvitore”, thuhet në njoftimin e bardhezinjve.

“Të infektuarit pritet të ritestohen sërish pas pak ditësh, sepse konsiderohet që të gjithë janë në fund të procesit të infektimit dhe afër shërimit të plotë”.

Skuadra do t’i vazhdojë përgatitjet në fushën e Istogut deri më 17-18 gusht, deri sa kundërshtarin në ndeshjen paraeliminatore e mëson më 9 gusht, kurse ndeshjen e zhvillon me 20 gusht varësisht shortit.

Prishtina kishte dalë me deklaratë se testimet nuk po bëhen shkaku i kontaktit me kryeministrin e vendit, Avdullah Hotin, i cili mori pjesë në ceremoninë e Kupës së Kosovës dhe më vonë doli pozitiv. Prishtina tha se testimet po bëhen vetëm shkaku i pjesëmarrjes në ligën e Evropës. /Gazeta Express/