Saka u përgjigjet kritikëve për lojën e Arsenalit

Futboll

Gazeta Express

24/05/2026 13:59

Bukayo Saka ka reaguar ndaj kritikëve që dyshuan në forcën mendore të Arsenalit, pas triumfit të shumëpritur të klubit në Premier League.

Ylli anglez tha se ata që e quanin Arsenalin skuadër që “dorëzohet në momentet vendimtare” tani kanë nisur të fshihen, ndërsa theksoi se ekipi ka fituar të drejtën t’u përgjigjet pas suksesit në kampionat.

Saka pranoi se kritikat ndaj Arsenalit shpesh kanë qenë më të mëdha se ndaj klubeve të tjera, sidomos kur skuadra humbte pikë apo pësonte rezultate negative. Sipas tij, lojtarët më parë nuk mund të reagonin pa u cilësuar si “tepër të ndjeshëm”, por titulli ka ndryshuar gjithçka.

Futbollisti 24-vjeçar foli edhe për vështirësitë personale gjatë sezonit, duke pranuar se problemet fizike ndikuan në disa paraqitje të tij. Megjithatë, ai theksoi se besimi, karakteri dhe uniteti brenda klubit ndihmuan Arsenalin të kalonte momentet e vështira.

Pas fitimit të Premier League, Arsenali tashmë synon një tjetër arritje historike: triumfin në Ligën e Kampionëve. Saka tha se titulli në Angli do t’i japë skuadrës më shumë besim dhe liri për finalen ndaj Paris Saint-Germain, ku klubi londinez kërkon trofeun e parë evropian në historinë e tij. /GazetaExpress/