Sa para fituan Joshua dhe Ruiz pas rimeçit

Gazeta Express

08/12/2019 14:51

Anthony Joshua gëzoi hakmarrje, u shpall kampione bote për herë të dytë dhe fitoi gati pesëfish më shumë të holla, pasi e rrahu Andy Ruizin në rimeçin e së shtunës në Arabinë Saudite.

Joshua e mposhti bindshëm me poenta pas 12 rundeve Ruizin, plot gjashtë muaj pasi ky i fundit e tronditi botën e boksit duke e mundur britanikun me nokaut në Nju Jork, raporton Gazeta Express.

Anthony Joshua thuhet t’i ketë fituar mbi 50 milionë funte, pasi i riktheu në pronësi titujt WBO, WBA dhe IBF, ndërsa Ruiz vetëm 10 milionë funte.

Gjyqtarët votuan unanimisht për Joshuan, i cili tani është dy herë kampion bote në kategorinë e rëndë.

Britaniku 30 vjeç pritet të marrë pushim tani, para se të rikthehet për t’i mbrojtur titujt.

Ai ka gjasa të detyrohet të luftojë pas rreth shtatë muajve, megjithatë, pasi presidenti i Organizatës Botërore të Boksit, Francisco Varcarcel, e ka urdhëruar Joshuan ta mbrojë titullin në divizionin WBO kundër sfiduesit mandatar Oleksandr Usyk në qershor. /Gazeta Express/