Rivaldo: Cavani do të ishte i mrekullueshëm për Barcelonën

Gazeta Express

24/01/2020 12:13

Legjenda e Barcelonës, Rivaldo, beson se Edinson Cavani do ta përmirësonte dukshëm dhe në mënyrë të mrekullueshme sulmin e Barcelonës, duke i inkurajuar kështu katalonasit ta zëvendësojnë Luis Suarezin e lënduar me sulmuesin e Paris Saint-Germainit.

Presidenti i Barcelonës Josep Maria Bartomeu, drejtori ekzekutiv Oscar Grau, drejtori i futbollit Eric Abidal, sekretari teknik Ramon Planes dhe trajneri Quique Setien u takuan të hënën në mbrëmje dhe vendosën që do ta transferojnë një sulmues këtë muaj për ta zëvendësuar Luis Suarezin, transmeton Gazeta Express.

Uruguaiani Suarez do të jetë jashtë fushës së lojës për katër muaj, pasi që është bërë operacion shkaku i një lëndimi në gjurin e tij të djathtë. Për këtë arsye, në mesin e disa futbollistëve që po monitorohet nga katalonasit është edhe Cavani.

Deri më tani, Atletico Madridi dhe Chelsea po e kryesojnë garën për t’i siguruar shërbimet e sulmuesit Cavani, i cili ia ka kërkuar PSG-së largimin, shkaku i minutave të paktë të lojës këtë sezon.

Prindërit e uruguaianit kanë sugjeruar se futbollisti do të preferonte të shkonte në Atletico Madrid. Por përderisa kjo nuk e ka dekurajuar Rivaldon ta shtyjë Barcelonën drejt transferimit të Cavanit, për të cilin PSG-ja po i kërkon 12.6 milionë funte.

“Cavani do të ishte një përforcim i mrekullueshëm për sulmin e Barcelonës tani që Suarezi nuk do të ketë mundësi të luajë për ca kohë”, ka thënë Rivaldo.

“Në fund të fundit, Cavani është një sulmues i nivelit më të lartë, i cili gjithmonë ka shënuar gola në ligat më të mëdha të Evropës. Në rastin e tij, ai duket se dëshiron të largohet nga PSG-ja dhe për Barcelonën ky është një rast shumë i mirë”. /Gazeta Express/