Rashica në histori të Werder Bremenit, pas golit ndaj Dortmundit

Gazeta Express

04/02/2020 23:26

Milot Rashica është futur në librat e historisë së klubit gjerman, Werder Bremen, falë golit që e shënoi të martën kundër Borussia Dortmundit në Kupën e Gjermanisë.

Anësori i Kombëtares së Kosovës, Rashica është bërë futbollisti i parë në histori të Bremenit që i shënon gjashtë gola radhazi në Kupën e Gjermanisë, raporton Gazeta Express.

?? Milot Rashica has now scored in 6️⃣ consecutive #DFBPokal matches ?

That's a new @werderbremen_en club record ⭐#SVWBVB pic.twitter.com/irPw0b0hYV

— The DFB-Pokal (@DFBPokal_EN) February 4, 2020

23-vjeçari shënoi një gol të mrekullueshëm duke e frymëzuar Bremenin ta mundë 3:2 Dortmundin, dhe ta sigurojë një vend në çerekfinale të kësaj gare.

Ky ishte goli i tij i tretë në po kaq ndeshje në edicionin e sivjetmë të kupës, pasi paraprakisht kishte realizuar ndaj SV Atlas në rundin e parë dhe kundër FC Heidenheim në rundin e dytë, para se të realizonte ndaj Dortmundit në rundin e tretë.

Rashica kishte shënuar edhe në tri ndeshjet e fundit të Bremenit në edicionin e kaluar të kupës, kundër Dortmundit në rundin e tretë, kundër Schalke 04 në çerekfinale dhe ndaj Bayern Munich në gjysmëfinale, ku edhe u eliminua Bremeni.

Kosovari i ka 10 gola dhe 4 asiste në 19 paraqitje në Bundesligë dhe në kupë për Bremenin deri tani këtë sezon, ndërsa goli i sotëm ndaj Dortmundit ishte i parë në vitin 2020./Gazeta Express/