Prokuroria kërkon që veteranëve t’u ndalen pensionet derisa të përfundojë procesi gjyqësor për listat e fryra


Gazeta Express
14 Mars 2019 12:04

Sot ka vazhduar seanca kundër të dyshuarve për fryrjen e listave të veteranëve. Në këtë seancë prokurori special, Enver Krasniqi, ka paraqitur kërkesën e tij që të pezullohet pagesa për 19 mijë veteranët deri në përfundim të procesit gjyqësor.

Sipas tij, kjo duhet të bëhet me arsyen se “si rezultati i veprës penale nga të pandehurit është dëmtuar buxheti i Kosovës dhe vazhdon të dëmtohet. Prandaj duke konsideruar buxhetin e Kosovës si interes publik, prokurori i shtetit ka autorizim të plotë ligjor për të kërkuar një gjë të tillë”, ka thënë Krasniqi, raporton Gazeta Express.

“Përfitues nga buxheti i Kosovës janë personat e tretë dhe një situatë e tillë kur me veprimet e të pandehurve si rezultat i veprave penale dhe kur përfitojnë personat e tretë përcaktohet rregulli për të dëmtuarin, që në rastin konkret kemi dëmtimin e buxhetit të Kosovës. Andaj bazuar në këtë fakt se personat e tretë të paraqitur në aneksin 1 të kësaj aktakuze si pasojë e veprës penale të të pandehurve nga 2015 deri në gusht 2018 kanë përfituar më shumë mbi 88 milionë euro”, ka shtuar ndër të tjera Krasniqi.

Ndërsa, dhjetë të akuzuarit të pranishëm në seancë janë deklaruar si të pafajshëm. Madje ata kanë thënë se aktakuza është e pabazuar.

Prokuroria Speciale e Kosovës, sot ka kërkuar nga Gjykata që të lëshohet urdhërarrest për dy të akuzuarit që kanë munguar në seancën e sotme, Ahmet Dakun dhe Xhavit Jasharin.

Mirëpo, Gjykata e ka hedhur poshtë kërkesën e Prokurorisë dhe ka vendosur që lënda të veçohet për këta dy të akuzuar.

Gjyqtarja Nushe Mekaj ka thënë se për Xhavit Jasharin e kanë vërtetuar se ka udhëtuar për në Austri më 7 mars, pasi e ka një familjare në gjendje të keqe shëndetësore.

Ai ka udhëtuar përmes pikës kufitare në Vermicë. Gjyqtarja ka thënë se ai kishte kërkuar që seanca të shtyhet pasi nuk gjendej në Kosovë.

Te fundit


Kthehu lart