Prokuroria e Lezhës ka nisur tashmë verifikimet për dëmet e shkaktuara nga tërmeti i 26 nëntorit.
Drejtuesi i prokurorisë së Lezhës Milan Laska, i ka kërkuar policisë që të verifikojë në terren të gjitha godinat e dëmtuara e veçanërisht ato që kanë pësuar dëmtimet serioze. Të gjitha rastet do të referohen në prokurorinë e rrethit.
Prokuroria po ashtu fton qytetarët që të denoncojnë rastet ku godinat kanë pësuar dëmtime për shkak të abuzimeve në ndërtim.
Deri në këtë fazë, prokuroria e Lezhës është në periudhën e verifikimit të ndërtesave të dëmtuara, por pritet që në ditët në vijim, të regjistrojë një procedim penale për akuzën e “Falsifikimit të dokumenteve”, “Shpërdorimit të detyrës” dhe “Ndërtimit të paligjshëm”.
Nga verifikimet e deritanishme rezulton se në qarkun e Lezhës janë 51 pallate të pabanueshme./Express