Presidenca i reagon Kurtit për letrën që ia çoi Lajçakut: Nuk je kryeministër legjitim, po e shkel hierarkinë kushtetuese

Gazeta Express

09/04/2020 15:58

Presidenca ka deklaruar se kryeministri në detyrë i Kosovës, Albin Kurti, nuk është konsultuar me të parin e shtetit, Hashim Thaçi, si udhëheqës i politikës së jashtme lidhur me ekipin negociator në dialog, për të cilin dje ka njoftuar, raporton Gazeta Express.

Përmes një komunikate për media, Presidenca ka deklaruar se kryeministri është shkarkuar dhe se me këtë qasje është duke e shkelur hiearkinë kushtetutese.

“Meqë dje dhe sot kishte shumë pyetje drejtuar Zyrës së Presidentit lidhur me Ekipin Negociator të proklamuar nga kryeministri i shkarkuar, Zyra për Informim e Presidentit të Republikës së Kosovës sqaron opinionin publik vendor dhe ndërkombëtar, se kryeministri në largim nuk është konsultuar me Presidentin si udhëheqës i politikës së jashtme. Kryeministri është i shkarkuar nga Kuvendi i Republikës së Kosovës dhe është kryeministër në largim i një qeverie në largim. Ai përveç që nuk është konsultuar me Presidentin si udhëheqës i politikës së jashtme, me këtë qasje është duke e shkelur edhe hierarkinë kushtetuese”, shkruhet në komunikatë.

Presidenca ka deklaruar se Kurti nuk mund të bëjë zotime në emër të institucioneve të Republikës së Kosovës dhe as në emër të një qeverie në largim. /GazetaExpress/