Rruga te rrethi në lagjen “Dragodan” të Prishtinës është vërshuar nga qumështi. Përfaqësuesit e fermerëve të qumështit e kanë bllokuar rrugën, ndërkaq në të e kanë derdhur qumështin.
Me këto veprime, ata kanë shprehur pakënaqësi meqë thonë se nuk u lejuan që të parakalojnë nga rruga “Garibaldi” rreth Katedrales, te Mensa e Studentëve e në fund për t’u ndalur te Qeveria e Kosovës.
Protesta vjen për shkak të pakënaqësive dhe injorimit të kërkesave të tyre për largimin e produkteve me vaj palme.
Policia e Kosovës ka thënë se kjo protestë nuk është lejuar të mbahet dhe ka lutur protestuesit që të shpërndahen.
Mirëpo, organizatori i kësaj proteste Ramadan Mema ka thënë se protestuesit nuk janë thirrur por kanë dalë vetë dhe se nuk ka të drejtë askush t’i pengojë.