Papa Françesku niset drejt Irakut, do ta ruajnë 10.000 policë e ushtarë

Lajme

Gazeta Express

05/03/2021 9:23

Papa Françesku është nisur me aeroplan për të zhvilluar një vizitë historike në Irak. Kjo është vizita e parë e një pape në shtetin me shumicë myslimane dhe udhëtimi i parë ndërkombëtar i Papa Françeskut që nga fillimi i pandemisë.

Gjatë qëndrimit katërditor në Irak, Papa Françesku pritet t’i ofrojë përkrahje komunitetit të krishterë që po tkurret dhe për ta nxitur dialogun ndërfetar, shkruan BBC, transmeton Gazeta Express.

Papa do të takohet me klerikun më të njohur të sektit Shia, do të bëjë lutje në Mosul dhe do të mbajë një meshë në një stadium.

Ai ka këmbëngulur që ta zhvillojë vizitën historike në Irak pavarësisht shtimit të rasteve me Covid-19 dhe shqetësimeve për masat e sigurisë.

Rreth 10.000 pjesëtarë të forcave të sigurisë do të jenë të angazhuar për ta mbrojtur Papa Françeskun, ndërkohë autoritetet kanë vendosur edhe orë policore për ta luftuar përhapjen e virusit.

Papa Gjon Pali i Dytë i kishte anuluar planet për ta vizituar Irakun në vitin 1999, pasi bisedimet me qeverinë e ish-presidentit Saddam Hussein kishin dështuar.

Në dy dekadat e fundit, një nga komunitetet më të vjetra të krishtera është tkurrur nga 1.4 milion në rreth 250.000 besimtarë. Shumë prej tyre kanë ikur në vende të huaja për t’iu shmangur dhunës së motivuar nga përkatësia fetare.