OSBE kritikon draftin e qeverisë për median: Pezullimi i botimeve masë ekstreme, shkel lirinë e shprehjes


Gazeta Express
11 Korrik 2019 18:08

Përfaqësuesi i OSBE-së për Lirinë e Medias Harlem Désir ka publikuar një raport shqyrtues në lidhje me ligjin e qeverisë Rama (Paketa anti- shpifje), i kritikuar hapur dhe në shumicë nga përfaqësuesit e medias si një draft që kërkon të vërë diktatin e qeverisë mbi median online shqiptare.

Përfaqësuesi ligjor ka vënë në dukje se projektligji do duhet të respektojë standardet ndërkombëtare për lirinë e medias dhe se ka ende nevojë për përmirësime në draft.

“Është e nevojshme që legjislacioni i ardhshëm të respektojë standardet ndërkombëtare dhe angazhimet e OSBE-së për lirinë e shprehjes dhe që të mos ndikojë negativisht në lirinë e medias në vend… e vlerësoj bashkëpunimin konstruktiv me autoritetet që çuan në përmirësime të shumta… Megjithatë, ende nevojiten përmirësime të mëtejshme të ligjit”-thuhet në raport.

Desir shton më tutje se Autoriteti i Medis Audiovizive nuk mund të zëvendësojë gjykatën për çështje të lirisë së shprehjes dhe se bllokimi apo pezullimi i botimeve në internet (siç parashikon drafti në disa raste) është një masë ekstreme e shtetit kundrejt lirisë së shprehjes dhe mund të pranohet vetëm për raste të shkeljeve serioze të të drejtave të njeriut apo parimeve demokratike.

“Autoriteti i Mediave Audiovizive (AMA), rregullatori i mediave audio-vizuale nuk duhet të jetë zëvendësim i gjyqësorit të pavarur apo mekanizmave të duhur vetërregullues për çështjet e lirisë së shprehjes.

Përfaqësuesi vuri në dukje se kompetencat e AMA-s lidhur me “bllokimin e përkohshëm / kufizimin e aksesit në internet” mund të zbatohen vetëm në tre rastet e qarta të përcaktuara në ligj: pornografia e fëmijëve; inkurajimin e akteve terroriste; dhe shkeljet e sigurisë kombëtare dhe kur masat e tilla konsiderohen si të nevojshme dhe proporcionale, duke marrë parasysh ekzistencën e një rreziku të afërt. ”-shkruan Desir.

“Zyra ime është e gatshme të vazhdojë të japë ndihmë për këtë ligj të rëndësishëm. Është me rëndësi të madhe që procesi i konsultimit publik të jetë i hapur dhe gjithëpërfshirës për të gjithë profesionistët e medias, organizatat e gazetarëve dhe aktorët e tjerë relevantë vendas dhe ndërkombëtarë të medias”- thuhet ne raport./Express

Te fundit


Kthehu lart