O’Brien: Trump i gatshëm të asistojë për marrëveshjen Kosovë-Serbi

Gazeta Express

29/02/2020 11:25

Shtetet e Bashkuara të Amerikës janë duke bërë përpjekje intensive që të shtyjnë Kosovën dhe Serbinë drejt një marrëveshje finale sa më shpejtë që të jetë e mundur. Për një gjë të tillë kanë emëruar dy Përfaqësues Special, dhe kanë shtyrë Prishtinën dhe Beogradin drejt arritjes së tri marrëveshjeve për rikthimin e linjës ajrore Prishtinë-Beograd, hekurudhë dhe për autostradë.

E për momentumin e krijuar pas këtyre marrëveshjeve Kosovë-Serbi është diskutuar edhe në Washington në një takim të kreut të shtetit, Hashim Thaçi, dhe këshilltarit të presidentit të SHBA’së për Siguri Kombëtare, Robert O’Brien, raporton Gazeta Express.

Pas këtij takimi në një njoftim të lëshuar nga National Security Council, thuhet se Presidenti i SHBA’së dhe Administrata e tij janë të gatshëm të asistojnë mes Kosovës dhe Serbisë për të arritur një marrëveshje nga e cila do të përfitonin qytetarët e dy shteteve.

 “Këshilltari për Siguri Kombëtare ka takuar presidentin e Kosovës, Hashim Thaçi për të diskutuar rreth momentumit të krijuar pas marrëveshjeve me Serbinë për linjën ajrore, hekurudhën dhe autostradën. Presidenti Donald Trump dhe Administrata e tij janë të gatshëm të asistojnë tek të dy palët për arritjen e një marrëveshje nga e cila do të përfitonin njerëzit në Serbi dhe Kosovë”, thuhet  njoftimin e NSC, raporton Gazeta Express.

Megjithatë hovi i SHBA’së për arritjen e një marrëveshje po ngadalësohet nga zhvillimet në Kosovë e Serbi. Kryeministri i ri i Kosovës, Albin Kurti, është duke rezistuar që të heq plotësisht taksën pas vendos asnjë kusht tjetër. Një gjë e tillë nuk është pritur fare mirë nga emisari i Trump për dialogun, Richard Grenell, i cili ka thënë se Albin Kurti po bën një gabim serioz.

Ndërkohë në Serbi në muajin prill do të organizohen zgjedhjet e përgjithshme për vendosjen e institucioneve të reja, zhvillim ky i cili pritet që të shtyjë edhe më tej arritjen e marrëveshjes.

Se duhet pritur përfundimi i zgjedhjeve në Serbi për të rinisur negociatat me Beogradin e ka thënë edhe kryeministri i Kosovës, Albin Kurti./GazetaExpress/

ICYMI: NSA O’Brien met with President Hashim Thaci of Kosovo to build upon the momentum of recent air, rail, & highway agreements w/ Serbia. @realDonaldTrump & his Administration are ready to assist both sides in reaching an agreement that benefits the people of Serbia & Kosovo. pic.twitter.com/Uq6Ks4VuQZ

— NSC (@WHNSC) February 28, 2020