Njerëzit në SHBA nuk po vdesin vetëm prej COVID-19, disa po pinë sterilizues të duarve

Gazeta Express

07/08/2020 12:27

Qendrat në SHBA për Kontrollin e Sëmundjeve (CDC) bëri të ditur se shumë njerëz po sëmuren madje edhe po vdesin pasi konsumojnë sterilizuesin e duarve.

Katër persona kanë humbur jetën dhe disa të tjerë kanë pësuar probleme në shikim.

Sterilizuesi i duarve është kudo edhe është mjaft i dobishëm për pastrimin e duarve gjatë periudhës së koronavirusit.

“Produktet e sterilizimit me bazë alkooli asnjëherë nuk duhet të konsumohen”, tha CDC në një raport të bërë së fundmi.

Një ekip i Kontrollit të Sëmundjeve mori në studim 15 raste të disa njerëzve në Arizona dhe New Mexico të cilët ishin të shtruar në spital për helmim, pasi kishin konsumuar sterilizuesin e duarve.

Administrata e Ushqimit dhe Barnave në SH.B.A ka paralajmëruar vazhdimisht se duhet bërë dallimi midis etanolit-alkoolit dhe metanolit pasi kjo e fundit është toksike dhe mund të helmojë njerëzit përmes lëkurës së tyre.

“Ne kemi dashur të shikojmë në mënyrë specifike ngjarjet në lidhje me metanolin, sepse dihet që është toksike dhe kërcënuese për jetën nëse konsumohet”, tha zëdhënësi i CDC për CNN.

Në raportin e bërë nuk ka asnjë informacion se përse njerëzit konsumojnë sterilizuesin e duarve.