Një i vdekur e dhjetëra të lënduar nga përplasja e trenave në Çeki

Gazeta Express

15/07/2020 9:28

Një person ka vdekur dhe dhjetëra të tjerë janë lënduar pas përplasjes së dytë fatale të trenave këtë muaj në Republikën Çeke.

Një tren udhëtarësh u përplas me një tren mallrash afër qytetit Cesky Brod, 34 kilometra në lindje të Pragës, të martën në mbrëmje, bënë të ditur shërbimet emergjente.

Së paku 35 persona janë lënduar. Prej tyre, tetë janë të lënduar seriozisht dhe dy janë në gjendje të rëndë. Personi i vdekur është njëri nga vozitësit e trenit, shkruan “Reuters”, transmeton Gazeta Express.

Ky është rasti i dytë fatal në një aksident mes trenave në Çeki këtë muaj. Më 7 korrik, dy persona vdiqën dhe 24 të tjerë u lënduan në një përplasje trenash në pjesën veriperëndimore të vendit, afër kufirit me Gjermaninë.