Një foshnje vdiq pas lindjes, prokuroria jep detaje për mjekun e arrestuar në Gjilan

Lajme

Gazeta Express

22/05/2021 17:32

Prokuroria Themelore në Gjilan ka caktuar masën e ndalimin për 48-orë për mjekun V.Th., në Spitalin e Gjilanit, në dyshimin se i njëjti e ka trajtuar në mënyrë të pandërgjegjshme mjekësore të dëmtuarën D.Th, shkruan Gazeta Express.

Sipas prokurorisë ka dyshime që mjeku nuk i ka përdorur metodat e përshtatshme të mjekimit pas lindjes.

Si pasojë e kësaj foshnja ka vdekur.

Njoftimi i plotë:

Gjilan, 22 Maj 2021– Prokuroria Themelore në Gjilan, Departamenti për Krime të Rënda ka kërkuar caktimin e masës së paraburgimit ndaj të pandehurit V.TH., për shkak të dyshimit të bazuar se ka kryer veprën penale ‘’Trajtimi i pandërgjegjshëm mjekësor’’, të Kodit Penal të Republikës së Kosovës.

Sipas kërkesës, ekziston dyshimi i bazuar se më 21 Maj 2021, i pandehuri V.TH., në Repartin e Gjinekologjisë në Spitalin Rajonal të Gjilanit, ka trajtuar në mënyrë të pandërgjegjshme mjekësore të dëmtuarën D.TH., në atë mënyrë që me rastin e lindjes së saj, duke përdorur metodat e pa përshtatshme të mjekimit, pas lindjes, për një kohë të shkurtë është konstatuar se fëmija është pa shenja jete.

Me urdhër të prokurorit të shtetit trupi i pa jetë i fëmiut është dërguar për obduksion në Institutin e Mjekësisë Ligjore, ndërsa i pandehuri V.TH., gjendet në ndalim 48 orësh.