Neymar: Do ta mbroj PSG-në, jam i lumtur këtu


Gazeta Express
10 Tetor 2019 8:43

Neymar tentoi t’i japë fund spekulimeve disamujore duke insistuar se ai është i lumtur dhe rehat në Paris Saint-Germain, për të cilët ka premtuar se do të japë gjithçka në fushën e lojës.

Sulmuesi brazilian e bëri të qartë dëshirën e tij për t’u larguar nga Paris Saint-Germaini, përkundër që e kishte forcuar transferimin te francezët vetëm para dy vjetësh për 222 milionë euro, transmeton Gazeta Express.

Pakënaqësitë e Neymarit në PSG bënë që dy klubet më të mëdha të Spanjës, Barcelona dhe Real Madridi të interesoheshin për të. Rivalët e “El Clasicos”, bashkë me Juventusin, hynë në garë për brazilianin, që në fund mbeti në PSG.

Drejtuesit e kampionit të Ligue 1 e bënë të qartë se ata do të ishin të gatshëm ta shisnin Neymari, mirëpo çmimi që ata e kërkonin për brazilianin ishte jashtë kapaciteteve të Barcelonës dhe Real Madridit.

Për më tepër, mediat spanjolle raporton se Paris Saint-Germaini preferonte t’ia shiste Neymari Real Madridit për shkak të marrëdhënieve të mira me madrilenët dhe marrëdhënieve tejet të tensionuara me Barcelonën.

Tifozët e PSG-së e fishkëllyen Neymarin kur ai u kthye në skuadrën e klubit francez këtë sezon. Megjithatë, braziliani iu është përgjigjur fishkëllimave dhe ofendimeve në stadium duke i shënuar katër gola në pesë ndeshje të Ligue 1.

“Të gjithë e dinë se çfarë ndodhi gjatë afatit kalimtar të verës dhe dëshirën që unë e kisha për t’u larguar. Sot, unë ndihem i lumtur dhe rehat me klubin, gjithashtu. Nuk jam i lumtur vetëm kur jam me ekipin kombëtar. Sezoni ka filluar mirë për mua”.

“Do ta mbroj klubin me të gjitha forcat e mira. E dija se do të duhet të përgatitem, në çfarëdo rrethane, për një sezon të mirë. Faleminderit Zotit që gjithçka ka nisur mirë dhe unë shpresoj që të mbetet kështu”.

27-vjeçari i kishte humbur më shumë se tre muaj të sezonit 2018/19 për shkak të një lëndimi në shputën e këmbës. Lëndimin e njëjtë braziliani e kishte pësuar edhe në sezonin paraprak. /Gazeta Express/

Te fundit


Kthehu lart