Në Kosovë 3.49 euro një litër, sa u shit vaji sot në rajon, Gjermani dhe Angli?

Lajme

Gazeta Express

10/03/2022 17:52

Një litër vaj u shit sot në Kosovë me çmim 3.49 euro. Kryeministri Kurti tha se sot çmimi i një litri vaj në Kosovë ka qenë më i larti në botë. Por sa ka kushtuar sot një litër vaj në vendet e rajonit dhe më gjerë? Express ju sjell detaje

Gazeta Express

Brenda dy ditësh në Kosovë, çmimi i një litri vaj pësoi rritje astronomike. Nga 1.60 euro, sa u shit pardje një litër vaj, ai sot kushtoi 3.49 euro.

Kjo nxiti reagime të shumta në vend teksa të shqetësuar ishin edhe qeveritarët.

Ndërkohë qytetarët në adresën e Gazetës Express kanë dërguar fotografi për të dëshmuar se sa kushton një litër vaj në vendet e rajonit dhe me gjerë.

Një lexues nga Maqedonia e Veriut ka njoftuar se atje sot një litër vaj ka kushtuar 1 euro e 59 centë.

Ndërkaq, nga Anglia kanë bërë të ditur mërgimtarët se një litër vaj ka kushtuar 1.09 funta, që i bie 1 euro e 30 centë.

Edhe në Gjermani sot vaji u shit dukshëm më lirë se në Kosovë.

Atje për një litër vaj, qytetarët kanë paguar 1.79 euro.

Për rritjen e çmimit të vajit sot u shpreh i shqetësuar edhe kryeministri Albin Kurti. Ai tha se çmimi me të cilin është shitur sot një litër vaj në Kosovë është artificial dhe i rritur nga persona në dëm të konsumatorëve.

“Është një fryrje artificiale në dëm të konsumatorëve të Kosovës. Nuk ka kurrfarë arsye, nevoje, për një fryrje të tillë. “Aktualisht çmimi i vajit në Republikën e Kosovës është më i lartë në botë. Bëhet fjalë për çmime të fryra të bëra nga faktori njeri e jo prej gjendjes objektive në terren. Këto çmime të fryra duhet të ç ‘fryhen. “Çmimi i vajit prej 3.49 cent është artificial, i paarsyeshëm dhe ka të bëjë me njerëz që dëshirojnë të përfitojnë nga një krizë botërore e jo nga gjendja reale në Kosovë”, deklaroi Kurti.

Se ka manipulim me çmimet e vajti e ka pranuar edhe ministrja e Drejtësisë, Albulena Haxhiu. Ajo sot i ka bërë thirrje prokurorisë që të fillojë hetimet.

Haxhiu ka rikujtuar se kurdisja dhe orkestrimi i çmimeve është vepër që sanksionet me burgim deri në 5 vite dhe gjobë shtesë.

Ndërkohë, një burim nga distribuesit e vajit i tha Gazeta Express se një litër vaj që qytetarëve po u shitet më shumë se dyfish më shtrenjte, nga shitësit është siguruar për 1,60 euro./Gazeta Express/