Mosmarrëveshjet për bashkëqeverisje, Abdixhiku i reagon Vetëvendosjes

Gazeta Express

03/12/2019 22:53

Deputeti i zgjedhur i Kuvendit të Kosovës nga radhët e Lidhjes Demokratike të Kosovës, Lumir Abdixhiku, ka folur për marrëveshjen për bashkëqeverisje rreth të cilës po negocion partia e tij me Lëvizjen Vetëvendosje.

Abdixhiku ka paralajmëruar kundër atyre që ai i ka cilësuar “ofendime” mes partnerëve të mundshëm të ardhshëm.

“Marrëveshjet e mosmarrveshjet mes partnerëve – po qenë e po u panë si të tillë njëmend – zgjidhen mes vete, sy më sy, e jo me ofendime nëpër studio televizive”, ka shkruar ai në llogarinë e tij, në rrjetin social Facebook, në internet.

“Deklarata të pamatura dhe pa kohë e vendosin mundësinë e bashkëpunimit disa hapa prapa. Ndoshta dhe ky është qëllimi”, është shprehur Abdixhiku.

Ai ka thënë se “propagandë për propagandë jemi ngopur mjaftë. Por nëse e kanë njëmend, me respekt ndaj njëri tjetrit e me respekt ndaj vullnetit qytetar, këtu jemi. Plot 28 deputetë të 206 mijë votuesve kosovarë”.