Ministria e Drejtësisë së shpejti do të publikojë konkurset për përmbarues privat


Gazeta Express
16 Korrik 2019 14:11

Ministri i Drejtësisë, Abelard Tahiri ka pritur në takim Presidentin e Unionit Ndërkombëtar të Përmbaruesve Mark Schmitz.

Schmitz po qëndron në Kosovë me rastin e shënimit të pesë vjetorit të përmbarimit privat në Kosovë.

Ministri Tahiri e njoftoi Presidentin e Unionit Ndërkombëtar të Përmbaruesve se profesionet e lira ligjore, në mesin e të cilave edhe përmbarimi, përbëjnë sistem që i përgjigjet një modeli dhe standardi me të ardhme të sigurt.

Ministri Tahiri potencoi se së shpejti do të publikohen edhe konkurset për të mbushur pozitat vakante për përmbarues privat.

“Këto pozita do të shpallen në bazë të analizave të bëra, sidomos për atozona gjeografike ku nuk ka prezencë të mjaftueshme për të ofruar shërbimet përmbarimore, duke përfshirë edhe në disa komuna të banuara kryesisht nga komunitetet jo-shumicë”.

Në anën tjetër, Schmitz përgëzoi Ministrinë e Drejtësisë dhe Odën e Përmbaruesve Privat për të arriturat dhe kontributin e përmbarimit privat në fuqizimin e sistemit të drejtësisë. Ai u zotua për avancimin e bashkëpunimit mes Unionit Ndërkombëtar të Përmbaruesve dhe Odës së Përmbaruesve Privat të Republikës së Kosovës. /GazetaExpress/

Te fundit


Kthehu lart