(E përditësuar) Partitë zëvendësojnë 21 kandidatë për deputetë që s’u certifikuan

Lajme

Gazeta Express

22/01/2021 18:08

Partitë politike i kanë zëvendësuar 21 kandidatë nga listat e tyre për shkak të problemeve që kanë pasur me ligjin.

“Ka disa parti që i kane zëvendësuar vullnetarisht deputetët, LDK, Lista Serbe e disa të tjera të minoriteteve”, tha Ylli Buleshkaj, nga Zyra për Regjistrimin e Partive Politike dhe Certifikim.

Ndërkaq, AAK’ja e Vetëvendosje nuk i kanë zëvendësuar kandidatët, emrat e të cilëve iu është kërkuar të hiqen.

“Nga 47 në listë kanë mbetur vetëm 26”, shtoi ai.

17:49 Valdete Daka: KGJK’ja na ka kthyer përgjigje se të dhënat për 47 kandidatët janë të sakta

Kryetarja e KQZ’së ka thënë se sot pas mbledhjes së Komisionit, i ka kërkuar përgjigje shtesë Këshillit Gjyqësor të Kosovës për të rikonfirmuar verifikimin e listave të kandidatëve për deputetë, që janë të dënuar sipas formës së prerë në tri vitet e fundit.

Daka thotë se KGJK’ja i ka kthyer përgjigjen se të dhënat për kandidatët për deputetë janë të sakta.

“Ju informoj se verifikimi i kandidatëve është bërë sipas data bazës qendrore e evidencës penale pranë sekretariatit të KQZ’së. N ë këtë databazë regjistrohen të gjitha sanksionet penale të shqiptuara me aktgjykim të prerë”, thuhet në letrën të cilën e lëxoi Daka në konferencë.

“Ne kemi konfirmim nga gjykatat e vendit, dhe kemi marrë konfirmim për saktësinë e dhënave dhe faktin se të cilat dënimet e plotfuqishme janë të proceduara në sistem”, thuhet tutje.

17:35 Ekskluzive, KGJK-ja i kthen përgjigje KQZ-së: Të dhënat për 47 kandidatët e dënuar janë të sakta

Këshilli Gjyqësor i Kosovës i ka kthyer përgjigje Komisionit Qendror Zgjedhor për të vërtetuar se a është e saktë lista prej 47 kandidatëve të dënuar në 3 vitet e fundit.

Gazeta Express mëson nga burime se KGJK-ja i ka kthyer përgjigje KQZ-së se lista me 47 persona të dënuar me aktgjykim të formës së prerë është e saktë.

Ndryshe, pas pak çastesh pritet të rinis mbledhja e KQZ-së, në të cilën pritet të vendoset rreth certifikimit ose jo të 47 kandidatëve për deputetë, në mesin e të cilëve është edhe i nominuari i VV-së për kryeministër, Albin Kurti.

Zyra për Regjistrimin e Partive Politike dhe Certifikim sot i ka propozuar Komisionit Qendror të Zgjedhjeve të certifikojë të gjithë kandidatët për deputetë.

Anëtarët e KQZ-së kërkuan dokumente shtesë për rekomandimin e Zyrës për Certifikim.

Kurti është dënuar për hedhjen e gazit lotsjellës në Kuvend. Sipas Aktgjykimit të Gjykatës Kushtetuese – me të cilin është rrezuar Qeveria e Avdullah Hotit për shkak të një vote të deputetit që ishte i dënuar – kandidatët me dënime të prera në tri vitet e fundit nuk duhet të certifikohen. /Express/