Macron ia çon Serbisë pesë selame, njëri është për Kosovën


Gazeta Express
12 Korrik 2019 9:57

Presidenti francez, Emmanuel Macron, do të realizojë një vizitë zyrtare në Beograd.

Mediat serbe raportojnë se Macron do të sjellë pesë mesazhe në Serbi, njëri prej të cilëve lidhet direkt me Kosovën.

“Anëtarësimi i Serbisë në Bashkimin Evropian para vitit 2028, plani që obligon Kosovën të heqë taksën, përmirësimi i bashkëpunimit ekonomik, fusha e sigurisë dhe sfera e kulturës dhe rinisë”, janë mesazhet kryesore që presidenti francez parashikon t’i përçojë në Serbi, sipas “Blicit”.

Kujtojmë se Loran Rui një gazetar francez, ka thënë se kancelarja gjermane, Angela Merkel, dhe presidenti i Francës, Emmanuel Macron, kanë vendosur që të përfshihen në çështjen Kosovë-Serbi, transmeton Lajmi.net.

Sipas tij, Franca asnjëherë nuk ka pushuar të jetë e interesuar për Ballkanin dhe Serbinë.

“Vizita e Macron në Serbi, e vërteton se interesi është rritur edhe më shumë. Edhe mua më duket se Franca shihet si një vend qendror në rajon dhe është e interesuar që Ballkani të bashkohet me BE-në, pavarësisht faktit se Macron tha se problemet duhet të zgjidhen në Bruksel dhe se kjo e zgjat pritjen e anëtarëve të rinj”.

Rui theksoi se politika e Francës, e cila e konsideron Ballkanin dhe Serbinë si pjesë të Evropës dhe dëshiron integrimin e tyre në BE, nuk ka ndryshuar.

Sipas tij, Macron dëshiroi të vizitonte Serbinë në dhjetor të vitit të kaluar, por u pengua nga protestat në Francë.

Ai shtoi se Macron, do të qëndrojë dy ditë në Serbi, ku do të ketë bisedime të shumta dypalëshe dhe do të nënshkruhen marrëveshje në fusha të ndryshme, duke përfshirë bashkëpunimin ekonomik.

Vlen të theksohet se ditë më parë, mediat në Serbi duke raportuar rreth vizitës së Macronit, thanë se Franca ka ndryshuar qëndrim ndaj Kosovës dhe po e mban anën e shtetit të tyre. Por, një gjë e tillë u mohua nga Qeveria e Kosovës. /Lajmi.net

Artikull i sponsoruar

Te fundit


Kthehu lart