LDK-ja kërkon të zbardhet forma se si qytetarët janë liruar nga karantina me kritere të dyshimta

Gazeta Express

04/06/2020 13:17

Në emër të Grupit Parlamentar të LDK-së, deputeti Ilir Ferati tha se është e domosdoshme që të themelohet Komisioni Hetimor Parlamentar për të zbardhur atë se çka ka ndodhur me menaxhimin e pandemisë.

Ai tha se është shumë me rëndësi që të zbardhet funksionimi i qendrës së karantinimit.

“Ne i kemi përcjellë me kujdes të gjitha zhvillimet rreth menaxhimit të gjendjes emergjente dhe veprimet e Ministrisë së Shëndetësisë, prandaj konsiderojmë që është shumë më rëndësi që të zbardhet funksionimi i qendrës së karantinimit, që të zbardhet kontrata dhe furnizimi me pajisje dhe produkte të tjera që kanë qenë të nevojshme për menaxhim të pandemisë. Gjatë punës Komisionit për Shëndetësi ka gjetur edhe shkelje dhe dyshime për keqmenaxhim në këto drejtime, që të zbardhet forma se si njerëzit janë liruar nga karantinimi me kritere të dyshimta. Që të zbardhet furnizimi me çmimet e larta pa u konsultuar çmimet referente”, tha ai.

Në këtë komision nga LDK-ja janë propozuar Ekrem Hyseni, Ilir Ferati dhe Rasim Demiri.