Basha në Laç: PD do i dalë për Zot kurbinasve


04/02/2019

Por nga ecja e zakonshme përmes qytetit, eventi është kthyer në një miting për shkak të numrit të madh të qytetarëve që merrnin pjesë. Basha tha se Rama nuk është kryeministër i shqiptarëve por i krimit dhe se PD do iu dalë zot kurbinasve.

“Mirë se ju gjej zonja e zotërinj, vëllezër e motra. Sot kisha programuar të isha në Laç në një ecje por e shoh se është kthyer në një miting spontan duke i bashkuar të gjithë me një zë dhe një qëllim. Asgjë nuk mund tju përçajë ju, kurbinasit trima, njerëz të besës e vlerave. Kam ardhur në mesin tuaj në mënyrë të vazhdueshme dhe i njoh problemet tuaja shumë mirë. E di se kjo zonë njerëzish trimash dhe punëtorë ka qenë shënjestër e oligarkisë dhe bandave të Edi amës për tiu lodhur e varfëruar e shtypur. Gjysma e familjeve janë larguar nga skema e ndihmës ekonomike sepse Edi Ramës dhe kukullave të tij nuk iu bëhet vonë për familjet e varfra të Kurbinit e Shqipërisë. Ka dhjetëra fshatra pa elektricitet sepse Edi Rama ju ka prerë drita, në vend ti subvencionojë e t’u japë para sepse ato para i do për veten e tij dhe oligarkët me të cilët ha. Spitali në qytetin tuaj në gjendjen më të keqe se spitalesh fushore të Luftës së Parë Botërore. E di që buxheti i shtetit dhe taksat tuaja janë kthyer në burime pasurie për again e Surrelit.

PD do iu dalë zot. Ne do të hapim rrugën që çdo bijë dhe bir kurbinas që dëshiron të ndjekë universitetin. Shteti shqiptar mund dhe do të paguajë për arsimin tuaj.Sot gjithë bota e di se Edi Rama nuk është kryeministër i shqiptarëve por kryeministër i krimit, i bandave, i Gjushit. Për sa kohë që vendi do drejtohet nga ai, negociatat nuk do hapen për të tretën herë. Ne do t’ia marrim paratë deri në fund oligarkëve dhe do t’ia kthejmë ju. Që të ndodhë kjo ne duhet të rikthejmë institucionet dhe ligjin. Pra zonja dhe zotëri ju e dini se për çfarë qëndrojmë ne. Bashkë prej ditës së parë, plani ynë ekonomik është hartuar nga ekspertët më të mirë të europës.

Qeveria do ketë mundësi që asnjë qytetar të mos mbetë pa bukë dhe pa ujë. Që të arrijmë te ajo ditë Europa ka nevojë për ndihmën tuaj. Ka nevojë për bashkimin e sovranit më 16 shkurt për t’i dhënë fund qeverisjes së Edi Ramës. Me këtë ftesë dua t’i shoh në sy dhe t’i them kini besim te drejtësia dhe ejani në Tiranë më 16 shkurt. Ndryshimi është në dorën tuaj. Bashkohemi të gjithë dhe të shkëpusim zinxhirët e varfërisë më 16 shkurt në Tiranë. Kështu do të bëjmë të mundur t’i japim fund varfërisë. Parlamenti nuk është pronë e Edi Ramës, por e sovranit. Një thirrje kam për dhjetëra socialist që janë të braktisur nga kjo qeverisje. 16 shkurti nuk është dita ku PD merr pushtetin por dita kur rrëzojmë një pushtet”, deklaroi kreu i PD.

Artikull i sponsoruar

Te fundit nga kategoria


Kthehu lart