Kuvendi miraton rezolutën për gjenocidin serb në Kosovë


Gazeta Express
16 Maj 2019 19:16

Me 79 vota për dhe asnjë kundër deputetët kanë votuar Rezolutën që dënon krimet nga forcat serbe gjatë luftës në Kosovë. 

Kryetari i Komisionit parlamentar ad hoc, Bilall Sherifi, ka paraqitur para deputetëve harmonizimin e Rezolutës me disa nga sugjerimet e deputetëve.

Ai ka thënë se pas një debati të gjerë të zhvilluar në seancën plenare kanë arritur të fusin në Rezolutë sugjerimet e deputetëve të bëra në debatin e sotëm.

Ai para deputetëve ka lexuar rezolutën në të cilën përfshihen krimet serbe në Kosovë gjatë vitit 1998-1999.

“Kjo Rezolutë ka ardhur duke u nisur nga fakti se viti 2019 shënon 20-vjetorin e krimeve të kryera në Kosovë, me qëllim zhdukjen e shqiptarëve, duke dëbuar rreth 1 milion persona, duke vrarë rreth 12 mijë civilë të pa mbrojtur të të gjitha etnive e kryesisht shqiptarë”,ka thënë ai.

Brenda Rezolutës ndër të tjera janë përmendur edhe vendet ku forcat serbe kanë kryer krime, e që sipas tij janë mbi 100 të tilla.

“Në vitin 1999 forcat serbe kryen mbi 100 masakra në Kosovë madje në disa vende edhe i djegën për së gjalli njerëzit, si në Breznik, Mitrovic,  Podujeve, Bellacerk, Randobravë, Krushë e Vogël, Krushë e Madhe, Gjakovë, Matiqan, Izbicë, Llashticë e Gjilanit, Rrezallë. Gjatë luftës ‘98-‘99 në Kosovë nënshtruan dhunë seksuale ndaj 20 mijë personave në Kosovë. Gjatë këtyre viteve dëbuan nga shtëpitë e tyre mbi 1 milion shqiptarë duke konfiskuar çdo dokument zyrtarë në mënyrë që të zhdukin çdo dëshmi”, ka shtuar ai.

Artikull i sponsoruar

Te fundit


Kthehu lart