Kurti emëron edhe një zëvendësministre

Gazeta Express

04/04/2020 19:41

Kryeministri në detyrë i Kosovës, Albin Kurti, sot ka emëruar një zëvendësministre të re në qeverinë që e udhëheq.

Liza Gashi nga sot është zëvendësministre në detyrë në Ministrinë e Punëve të Jashtme dhe Diasporës.

Përmes një kumtese për media, theksohet se puna e përkushtimi i saj me diasporën e për diasporën tonë, tash merr formë tjetër e mundësi të re.

“Menaxhimi, ndërmarrësia, hulumtimi, diplomacia dhe zhvillimi janë fusha në të cilat znj. Gashi ka bërë studime dhe ka përvojë globale. Studimet Master për administratë publike i ka mbaruar në Arizona State University kurse ato Bachelor për marrëdhënie ndërkombëtare, shkenca politike dhe gjuhë spanjolle në Wartburg College në Iowa. Po ashtu ka diplomuar në United World College në Kosta Rikë dhe në National University of Córdoba në Argjentinë. Ka udhëhequr shumë shoqata, organizata e projekte, ndërkaq së fundmi ishte drejtore ekzekutive e Germin, një emër suksesi ky i urës sonë me diasporën. Diaspora jonë kërkon punë dhe vazhdimësi në procesin për ndërtimin e urave ndërlidhëse. Liza Gashi është mirë e përgatitur dhe me ekspertizë të i shërbej kësaj nevoje pikërisht tani. Liza Gashi nuk është anëtare e Lëvizjes VETËVENDOSJE!”, përfundon njoftimi.