Kryetarja e Kushtetueses akuzon Gjykatën e Lartë: Shpallja e vakancës veprim i paprecedentë

Shqiperi

Gazeta Express

12/12/2024 20:19

Kryetarja e Gjykatës Kushtetuese thirri sot mbledhjen e gjyqtarëve për të vendosur për fatin e mandatit të saj.

Në njoftimin për mediat, Holta Zaçja sqaroi se trupa gjyqësore nuk mori një vendim dhe mbledhja u shty.

“Në emër të interesit publik, në mbrojtje të institucionit që drejtoj dhe për të shmangur mosmarrëveshjet kushtetuese, vendosa t’i drejtohem mbledhjes së gjyqtarëve në ushtrim të përgjegjësive të mia si anëtare e Gjykatës Kushtetuese për deklarimin e mbarimit të mandatit. Trupa e Kushtetueses u mblodh pa arritur në një vendimmarrje, duke e shtyrë seancën,” sqaroi Zaçja.

“Shpallja e vendit vakant nga Gjykata e Lartë, pa një vendim të Kushtetueses, e ka zhveshur këtë të fundit nga kompetenca kushtetuese, veprim ky i paprecedent dhe i marrë me një urgjencë të pajustifikuar,” sqaroi Holta Zaçja në një njoftim për mediat.