Kreu i Komunës së Malishevës jep detaje për personin e fundit që u prek me koronavirus

Gazeta Express

30/03/2020 12:41

Numri i të infektuarve me koronavirus në Kosovë ka arritur në 94 persona, tre prej të ciëve janë rastet e fundit që janë shtuar në orët e mbrëmjes së ditës së djeshme.

Ndërsa, komuna e cila është prekur më së shumti është ajo e Malishevës, shkruan Insajderi.

Deri më tani numri i të infektuarve në këtë komunë ka arritur në 33.

E, rasti i fundit në këtë komunë që është paraqitur mbrëmë është nga fshati Kijevë.

Kryetari, i Komunës së Malishevës, Ragip Begaj, ka thënë për Insajderin se ky rast ka ardhur nga jashtë.

“Ne jemi duke hulumtuar, Instituti Kombëtarë i Shëndetësisë Publike është duke hulumtuar në këtë drejtim për të shikuar lidhjet familjare të tyre, është rast i ri për neve, është rast i ardhur nga jashtë. Janë duke i hulumtuar kontaktet dhe do të shkojnë në testim. Dyshimet nuk hiqen asnjëherë”, ka thënë ai, për Insajderin.

Kurse, duke folur për gjendjen e personave të infektuar me këtë virus, Begaj ka thënë se gjendja e tyre është stabile.

“Gjendja është e qetë, është shqetësim i përgjithshëm i joni edhe për Malishevën edhe për qytetarët tonë, megjithatë ata e ndiejnë veten të qetë, situata po menaxhohet mirë, edhe familjet po mundohemi me i menaxhu mirë brenda kushteve që ne i kemi këtu. Gjendja e personave të infektuar është e qetë, ata janë stabil”, ka deklaruar Begaj.

E, ditëve të fundit në këtë komunë janë ankuar që Qeveria nuk po i ndihmon mjaftueshëm.

Për këtë, Begaj ka deklaruar se më nuk do të ketë ankesa, duke shtuar se le të mbetët nën përgjegjësinë e tyre, pasi që e dinë që Komuna e Malishevës ka më së shumti raste në nivel vendi.

“Ne jemi ankuar që nuk po ndihmojnë, mirëpo nga sot nuk do të ankohemi le të jetë përgjegjësi e tyre, sa e kanë ndihmu Malishevën ata e dinë, ne i kemi publiku, edhe ndihmat që na kanë dhënë Malishevës janë shumë të pakta edhe janë ndoshta të pamjaftueshme për ta menaxhuar situatën . Megjithatë le të jetë në përgjegjësinë e tyre, ata janë ekspertë të kësaj lëmie dhe e dinë se çka i duhet Malishevës në këtë kohë dhe në bazë të rasteve që kemi më së shumti në nivel vendi”, ka deklaruar Begaj.

Kurse, për vazhdimin e karantinimit tha se nuk janë konsultuar nga qeverisja qendrore.

“Është përgjegjësi e nivelit qendror, nuk e di sa do të zgjasë karantina, disa vendime që i kanë marrë kanë qenë deri më 6 prill, ata na kanë njoftuar për këtë, më shumë nuk di”, ka thënë ai.

Deri më tani në mbarë botën nga koronavirusi, janë infektuar 731 mijë e 735 persona, ku prej tyre 154 mijë e 430 janë shëruar, ndërsa kanë vdekur 34 mijë e 663 persona.