Klubi del me raport për gjendjen e sulmuesit të Kosovës, i cili i humbi ndjenjat në fushë

Futboll

Gazeta Express

25/10/2021 9:15

Astrit Selmani e ka pësuar një tronditje në kokë nga një përplasje që e kishte lënë shkurtimisht pa ndjenja në fushë të dielën dhe si pasojë do t’i duhen disa ditë pushim para se të rikthehet në stërvitje, njofton klubi i sulmuesit kosovar Hammarbay.

Ylli i Kombëtares së Kosovës Selmani u dërguar urgjentisht në spital, pasi i kishte humbur ndjenjat për disa çaste në fitoren ekipit të tij Hammarby kundër Ostersunds të dielën, raporton Gazeta Express.

Ai ishte titullar për Hammarby në takimin e ligës elitare të Suedisë kur ra në tokë pa ndjenja pasi u përplas në ajër me kundërshtarin.

Incidenti ndodhi në minutën e 40-të të ndeshjes dhe pasi mori tretman në fushë dhe iu kthye vetëdija, 24-vjeçari u dërgua në spital.

Selmani – i cili debutoi për Kosovën në humbjen kundër Suedisë në një ndeshje kualifikuese për Kupën e Botës 2022 në shtator –iu nënshtrua ekzaminimeve mjekësore në spital.

Tani, pasi kaloi pak kohë në spital, klubi suedez njoftoi se ai e ka qepur vetullën e carë nga përplasja dhe do të pushojë disa ditë shkaku i tronditjes në kokë.

“Astriti i ka kryer ekzaminimet në spital, të cilat janë normale në raste të tilla. Ai e ka pësuar një tronditje si pasojë e përplasjes me kundërshtarin në fushë. Atij i është qepur vetulla dhe nuk ka ndonjë lëndim tjetër. Disa ditë pushim dhe Astriti mund t’iu kthehet stërvitjeve”, thuhet në njoftimin e Hammarby në Tëitter.

Hammarby po humbiste 2:3 kur Astriti u bart jashtë fushës, por ia doli të fitojë 4:3 në fund për t’u ngjitur në vendin e katërt në tabelën Allsvenskan me 40 pikë, shtatë më pak se lideri Djurgarden.

Selmani i ka bërë 23 paraqitje në ligë për Hammarby deri tani këtë sezon, duke kontribuar me katër gola dhe gjashtë asiste./Gazeta Express/

Astrit har nu genomgått undersökning på sjukhus, vilket är standard vid den här typen av händelser. Den visar att kollisionen orsakade hjärnskakning. Tre stygn för såret vid ögonbrynet, inga övriga skador. Några dagars vila väntar innan Astrit kan trappa upp träningen. #Bajen pic.twitter.com/5OjKVQQEAX

— Hammarby Fotboll (@Hammarbyfotboll) October 24, 2021