“Kam emrin më të gjatë në botë – ka 2.253 fjalë dhe më duhet një orë për ta shkruar”

Fun

Gazeta Express

24/12/2025 20:08

Emri i një personi është një pjesë thelbësore e identitetit të tij. Ai është mënyra kryesore se si prezantohemi para të tjerëve dhe zakonisht është gjëja e parë që përmendet në një bisedë.

Në situata informale, rrallëkush e përdor emrin e plotë, por në raste zyrtare – si dasmat, dokumentet ligjore apo aplikimet për vizë – ai bëhet i domosdoshëm.

Nëse dikush ka disa emra të mesëm, kjo mund ta zgjasë pak procesin. Por për një burrë nga Zelanda e Re, kjo është një histori krejt tjetër: ai ka 2.251 emra të mesëm, duke e bërë emrin e tij të plotë më të gjatin në botë.

Laurence Watkins mban rekordin botëror të Guinness për emrin më të gjatë. Në vitin 1990, ai bëri një ndryshim ligjor, duke i shtuar emrit të tij origjinal të gjithë emrat e mesëm, çka rezultoi në një emër me 2.253 fjalë.

Ideja lindi pasi Laurence lexoi Librin e Rekordeve Guinness. Në atë kohë, ai punonte si shpërndarës për një bibliotekë lokale dhe vendosi të krijonte “emrin përfundimtar” – një rekord unik që do ta bënte të pavdekshëm në histori.

Megjithatë, emri i jashtëzakonshëm ka sjellë edhe vështirësi praktike. Ai ka krijuar probleme në procedura zyrtare, përfshirë edhe dasmën e tij, ku celebranti i martesës u deshën 20 minuta për ta lexuar emrin e plotë.

Sipas The Mirror, edhe dokumentet e udhëtimit janë sfiduese. Laurence ka treguar:

“Pasaporta ime ka një shënim ku shkruhet ‘Shihni faqet për listën e emrave’, me gjashtë faqe shtesë të bashkëngjitura. Dhe e vetmja herë që e kam dëgjuar emrin tim të plotë të lexohet me zë të lartë ka qenë në dasmën time – dhe zgjati 20 minuta.”

Kur u pyet për emrat e tij të preferuar, ai u shpreh:

“Shumë prej tyre janë të vështirë për t’u shqiptuar edhe për mua, por dy më të dashurit janë Kalwhakamatautau dhe AZ2000 – që do të thotë se kam emra nga A në Z dhe më shumë se 2.000 emra. Secili prej tyre ka një domethënie të veçantë për mua.”

Edhe pse mban një rekord botëror, Laurence pranon se shpesh zhgënjehet nga reagimi i njerëzve:

“Kur u them njerëzve se kam mbi 2.000 emra, reagimi i tyre është zakonisht i vakët. E kuptoj që nuk mund të pres të njëjtin entuziazëm nga të tjerët, pasi kjo nuk i prek ata personalisht, por prapë mbetet pak zhgënjyese.”

Laurence nuk është i vetmi “rekordmen” me një emër të vështirë për t’u menaxhuar. Në Mbretërinë e Bashkuar ekziston edhe një fshat i famshëm për një nga emrat më të gjatë në botë – dhe më i gjati në Evropë.

Fshati Llanfair­pwllgwyngyll­gogery­chwyrn­drobwll­llan­tysilio­gogo­goch, në Anglesey, ka një emër që përkthehet si:

“Kisha e Shën Marisë në gropën e lajthisë së bardhë pranë një vorbulle të shpejtë dhe Kisha e Shën Tysilios pranë shpellës së kuqe.”

Për ta thjeshtuar jetën e përditshme, shumica e tabelave rrugore përdorin vetëm shkurtimin: “Llanfair PG”. /GazetaExpress/