Kafshët shtëpiake “dominojnë” galerinë e telefonit të pronarëve të tyre

Fun

Gazeta Express

01/05/2026 21:31

Pronarët e kafshëve shtëpiake ruajnë më shumë foto të tyre sesa të partnerëve apo familjarëve, sipas një sondazhi të fundit që tregon se galeria e telefonit shpesh reflekton atë që njerëzit vlerësojnë më shumë.

Studimi, i realizuar me 2,000 persona, zbulon se një pronar mesatar ka rreth 20% më shumë fotografi të kafshëve të tij – si qen, mace apo të tjera – krahasuar me ato të partnerit apo të afërmve. Mesatarisht, në telefon ruhen rreth 176 foto të kafshëve, ndërsa vetëm 147 të partnerit, 65 të prindërve dhe 57 të miqve të ngushtë.

Sipas të dhënave, brezi i Millennials kryeson me numrin më të madh të fotove të kafshëve (mesatarisht 217), i ndjekur nga Gen Z me 204, ndërsa Boomers kanë dukshëm më pak, me rreth 103 fotografi.

Gati gjysma e të anketuarve (46%) e shohin fotografimin si një mënyrë për të shprehur dashurinë, ndërsa katër në dhjetë besojnë se galeria e telefonit është tregues i qartë i prioriteteve emocionale.

Për shumicën, rikthimi tek këto foto sjell ndjenja gëzimi, nostalgjie dhe ngrohtësie. Vetëm gjatë muajit të fundit, pronarët kanë shtuar mesatarisht 20 foto të reja të kafshëve të tyre, ndërsa 14% pranojnë se fotografojnë çdo ditë.

Rreth 69% e tyre përdorin tashmë filtra apo mjete inteligjente për të përmirësuar imazhet, ndërsa një pjesë e konsiderueshme i shpërndan këto foto edhe në rrjetet sociale. Sipas sondazhit, 48% kanë vënë re se postimet me kafshët marrin më shumë reagime se çdo përmbajtje tjetër.

Në fund, mbi gjysma e pjesëmarrësve (52%) e konsiderojnë kafshën e tyre si një anëtar të plotë të familjes – një arsye më shumë pse ajo zë vendin kryesor në kujtimet e përditshme dhe në galerinë e telefonit. /GazetaExpress/