Italia mirëpret rifillimin e dialogut Kosovë-Serbi, inkurajon palët për qasje largpamëse

Gazeta Express

12/07/2020 17:13

Ministrisë së Punëve të Jashtme të Italisë nëpërmjet një komunikate ka theksuar se Italia mirëpret video-konferencën e sotme në Bruksel e cila shënon rifillimin e dialogut mes Kosovës dhe Serbisë të lehtësuar nga Bashkimi Evropian.

Sipas komunikatës, duke rikonfirmuar mbështetjen e palëkundur italiane për aspiratat legjitime evropiane të Kosovës dhe Serbisë, inkurajojnë të dy palët që të punojnë në mënyrë konstruktive dhe me qasje largpamëse, në përputhje me perspektivën e tyre evropiane.

“Ne mbështesim lehtësimin e udhëhequr nga Përfaqësuesi i Posaçëm i BE-së, Miroslav Lajcak, për të gjetur një marrëveshje të qëndrueshme dhe afatgjatë që garanton paqen dhe stabilitetin në rajon, si dhe mirëpresim çdo nismë që synon fuqizimin e përpjekjeve të PPBE-së Lajcak”, thuhet në komunikatë.