PDK-ja kundër minishengenit: E izolon Kosovën, e zgjeron Serbinë pa na njohur - Gazeta Express

PDK-ja kundër minishengenit: E izolon Kosovën, e zgjeron Serbinë pa na njohur

Gazeta Express

21/10/2020 13:04

Deputeti i PDK-së, Enver Hoxhaj, në seancën e sotme të Kuvendit e ka kritikuar kryeministrin Avdullah Hoti për nënshkrimin e marrëveshjes në SHBA ku pos tjerash palët janë dakorduar edhe për minishengenin, raporton Gazeta Express.

Hoxhaj ka thënë se në Washington Kosova izolohet në dy tema, në atë për mosaplikim në organizata ndërkombëtare, e tjetra është ajo për minishengenin.

“Këto tri interpelanca janë një temë, nëse mosaplikimi në organizata, ka qenë kërkesë e Serbisë për ta izoluar Kosovën, minishengeni është një rreth i dytë për ta izoluar Kosovën në rajon, nuk po them asgjë të re këto i kemi thënë para 4 vjetëve, nuk mund të ketë bashkëpunim rajonal pa njohje reciproke të Kosovës”, thotë deputeti i PDK-së.

Deputeti thotë se duhet të ketë ligj të veçantë të hartuar për minishengenin.

“Prandaj minishengeni nuk i jep mundësi vetëm Serbisë për të zgjeruar tregun dhe për të pasur qasje në Adriatik, por i jep Serbisë mundësi pa e njohur Kosovën, pa hequr dorë nga marrëveshjet me Rusinë. Qeveria duhet të sjellë ligj për minishengenin se si do me ju qasë, jo vetëm një rezolutë e rregullore, se loja rreth saj mund të jetë më e madhe më e komplikuar. Minishengeni mund të jetë përpjekje për me shfuqizu kushtin që e ka Serbia për të njohur Kosovën, e di goxha mirë se çka mendohet dhe çka mund të ndodhë”, ka thënë ai. /GazetaExpress/