Hoti: Telekomi do ta ketë mbështetjen e Qeverisë

Gazeta Express

10/08/2020 12:15

Kryeministri i Kosovës, Avdullah Hoti, ka premtuar mbështetjen e Qeverisë për Telekomin e Kosovës, raporton Express.

Hoti ka njoftuar se sot ka zhvilluar takim virtual me ministrin e Ekonomisë dhe Ambientit, Blerim Kuçi, dhe anëtarët e Bordit të Telekomit, me të cilët ka biseduar për gjendjen në këtë ndërmarrje.

Ai ka bërë me dije se shumë shpejt do të diskutohet edhe plani për rimëkëmbje, që është duke u përgatitur nga Bordi i Telekomit.

“Bashkë me ministrin e Ekonomisë dhe Ambientit, Blerim Kuçi, sot kemi zhvilluar takim virtual me anëtarët e Bordit të Telekomit, me të cilët biseduam për gjendjen e përgjithshme në këtë ndërmarrje. Qeveria e Kosovës, si aksionar, do ta mbështesë këtë ndërmarrje me interes strategjik për vendin dhe shumë shpejt do të diskutohet edhe plani për rimëkëmbjen, i cili është duke u përgatitur nga Bordi i Telekomit”, ka shkruar Hoti. /Gazeta Express